المساعد الشخصي الرقمي

مشاهدة النسخة كاملة : مصطلحات عامية سودانية


الصفحات : [1] 2

حسن محمد
23-03-2011, 10:48 AM
وجود الناس في الغربة ولسنين طوال يخلق نوع من اللغة الهجين خصوصا عند الابناء اللذين ولدوا وعاشوا وتعلموا فيها واصبحت لغة التواصل عندهم واحيانا تجد لغتهم في البيت غير المدرسة غيرالشات
واحرص دائما في زياراتي ان اسال الابناء
عن اشياء احسب ان الزمن تجاوزها لكنها تظل ثقافة شعب عمره الاف السنوات مثلا اسال عن التكل,الطايوق,المعراكه , اللدايه.....الخ لكني بالامس فؤجئت في زياره لاحد الاصدقاء بان الكثير من الموروث الشعبي قد اندثر وذلك عندما جاء ذكر(المزيرة)في حديثي مع صديقي في وجود ابنه(تانية جامعة)الذي سالني بلهجة (شهادة عربية) مزيره يعني شنو ياعمو.
اكبرت فيه السؤال وشرحت له الكثير مع علمي ان والده كان يشرب من جلد شاه مرفوع علي ثلاث يفزع ابنه لو راه في ليلة مقمره في تلك الاصقاع .
وعلمت ان العيب فينا وليس في الابناء لذا اقترح تثبيت بوست مع تطوير الفكره والمناشده بمدنا بالمعلومات عن الالعاب الشعبيه والاحاجي والاسماء ,و..و..و

احمد الحبر
23-03-2011, 11:09 AM
فكره مقبوله ..
تم تثبيت هذا البوست ليكون نقطة الانطلاق وياريت تتبنى هذا الموضوع وتثريه بما تختزنه ذاكرتك في هذا الخصوص ..

حسن محمد
23-03-2011, 11:20 AM
شكرا للاخ احمد للاستجابه السريعه وابدا بالسؤال عن الكلمات الوارده اعلاه
التكل
الطايوق
المعراكه
المحراكة
اللدايه

ابوحنينة
23-03-2011, 12:14 PM
ذهبت الى العمرة ومعى معاذ ابن الاخت (لها الرحمة ) ونحن فى الحرم قلت له يا معاذ اذا رحت مننا اجلس مقابل السبلوقة حقت الحرم رد لى ياخالو السبلوقة دى شنو مع العلم ان عمره كان 14 سنة
(اولاد الرياض )
ماذكر سابقا كلام طيب وجميل من اجل الحفاظ عليه

حسن محمد
23-03-2011, 12:18 PM
شكرا ابو حنينة الرجاء ان تمدنا بالمزيد من (السحاره)

هاشم عبد الكريم
23-03-2011, 09:40 PM
موضوع رائع وجميل ، راودتنى الفكرة فى الكتابة فى هذا الموضوع من قبل ولكنى فكرت فى ان هذه الكلمات لم تعد هنالك الحاجة لمعرفتها لعدم إستعمالها فى حياتنا اليومية ،وخاصة فى دول الإغتراب التى فعلا تؤثر على الكلمات السودانية ، وليكن الموضوع منظم ومسلسل وقابل للتداول والمعرفة فلنبدأ بالكلمات التى لها صلة بالمطبخ والطعام وننتقل بعدها لأُخرى .مع أن هذه الكلمات تصاحبها كثير من المواقف المضحكة ،نرجوا أن لا يبخل بها الاخوة الاعزاء .كسبلوقة اخونا ابو حنينة ،
(وكل من لديه سحارة فليوقد الرتينة ويعلقها فى النتاق وينكت الحُجج)

الوان
23-03-2011, 09:56 PM
[size="5"]شكرا للاخ احمد للاستجابه السريعه وابدا بالسؤال عن الكلمات الوارده اعلاه
التكل
الطايوق
المعراكه
المحراكة
اللدايه

المرادف للتكل هو المطبخ اب سراميك وحليل العواسه فوق الدوكه وريحة طايوقها تجوع

سلوى حسن جمبو
23-03-2011, 10:05 PM
الأخ حسن بارك الله فيك بوست رائع وامكن يكون ذو فائدةلاجيال لم يعيشون بالغربة وهم فى السودان و لايعرفون بعض المصطلحات واسماء الاشياء التى يعرفها اهاليهم فيجب تعريفهم بها قبل مايسألوا منها حتى اذا مرت بهم يكونوا على معرفة بها
التكل هو المطبخ قديماً بيت يصنع من القش والحطب بتم فيه الطهي للمأكولات السودانية
الدوكة تصنع بها الكسرة توضع فوق قوائم وهى عبارة عن حجارة تسمي ( اللدايات ) ولا بد من وجود النار لتسخين الكسرة و الدوكة فى الأصل كانت مصنوعة من الفخار .
المعراكة قطعة من القماش تخصص ليمسح بها الطايوق والزيت على الدوكة او الصاج اثناء عواسة الكسرى
الطايوق هو عبارة عن النخاع الموجود العظام و من رأس الذبيحة {المخ}
المحراكة هى عبارة عن حجرين كبيرين حجر طولي وثابت على الارض والثانى متوسط يطحن بهما الذرة لتصبح دقيق يعنى بدل الطاحونة الأن وايضاً تستخدم لطحن الفول السودانى ليصبح دكوة أى{زبدة الفول }
القرقريبة : تصنع من السعف وتستخدم في العواسه

أقترح بان يسمى البوست {لغتنا العامية و مصطلحات سودانية}

الوان
23-03-2011, 10:11 PM
الأخ حسن بارك الله فيك بوست رائع وامكن يكون ذو فائدةلاجيال لم يعيشون بالغربة وهم فى السودان و لايعرفون بعض المصطلحات واسماء الاشياء التى يعرفها اهاليهم فيجب تعريفهم بها قبل مايسألوا منها حتى اذا مرت بهم يكونوا على معرفة بها
التكل هو المطبخ قديماً بيت يصنع من القش والحطب بتم فيه الطهي للمأكولات السودانية
الدوكة تصنع بها الكسرة توضع فوق قوائم وهى عبارة عن حجارة تسمي ( اللدايات ) ولا بد من وجود النار لتسخين الكسرة
وأعتقد أن الدوكة الأصل كانت مصنوعة من الفخار .
المعراكة قطعة من القماش تخصص ليمسح بها الطايوق والزيت على الدوكة او الصاج اثناء عواسة الكسرى
الطايوق هو عبارة عن النخاع الموجود العظام و من رأس الذبيحة {المخ}
المحراكة هى عبارة عن حجرين كبيرين يطحن بهما الذرة لتصبح دقيق يعنى بدل الطاحونة الأن وايضاً تستخدم لطحن الفول السودانى ليصبح دكوة أى{زبدة الفول }

كان الكلام ده صاح معناها انت ولدوك مع الكسره ذاااااااااااته

سلوى حسن جمبو
23-03-2011, 10:23 PM
كان الكلام ده صاح معناها انت ولدوك مع الكسره ذاااااااااااته

نحن تربية سودان وحبوبات الحمدلله ماذى ناس الشهادة العربية

سلوى حسن جمبو
23-03-2011, 11:40 PM
المشلعيب :-
وهو يصنع من سعف النخيل
وتوضع به الاشياء التي يخافوا عليها من النمل والقطط والكلاب مثل اللبن او الروب وباقى حلة الملاح كما أن ارتفاعه عاليا يجعله معرض للهواء البارد مما لا يتلف محتوياته

http://www.elafoon.net/board/up/download.php?img=2422

هاشم عبد الكريم
24-03-2011, 01:14 AM
الدوكة تصنع بها الكسرة توضع فوق قوائم وهى عبارة عن حجارة تسمي ( اللدايات ) ولا بد من وجود النار لتسخين الكسرة و الدوكة فى الأصل كانت مصنوعة من الفخار .
القرقريبة : تصنع من السعف وتستخدم في العواسه

أقترح بان يسمى البوست {لغتنا العامية و مصطلحات سودانية}
مع إضافة :اللداية هى ثلاث حجار توضع تحت القدر وتوقد اسفلها النار وتكون اربعة واكثر فى حالة وضعها تحت الدوكة (صاج العواسة)
سجلت كروت الهاتف البلاستيكيه فشلا زريعا فى عواسة الكسرة عند المغتربات فطالبن باستيراد القرقريب من السودان لان السعف هنا تلينه الرطوبة فينتج كسِره ناقصه رصيد )

حسن محمد
24-03-2011, 07:59 AM
الاخت سلوي نشكرك علي المرور والاضافات الثره ونحن في انتظار المزيد خصوصا التدعيم بالصوره رائع جدا
بالمناسبه معظم هذه الاسماء نوبية

حسن محمد
24-03-2011, 08:05 AM
الاخ بما ان حافري وقع علي حافرك في هذه الفكره لذا نرجو التبني وانا اتواضع في حضور سلوي وهاشم مبدعون ,متفاعلون اولاد بلد تربية حبوبات صاااااااح

حسن محمد
24-03-2011, 08:10 AM
الخماره
التوار
التيبار
الكنش
الكتوش
الطرقة
الضرابة
كل هذا في انتظار سلوى حتى ننعم بوجبة الافطار

um rayan
24-03-2011, 08:29 AM
الخماره
التوار
التيبار
الكنش
الكتوش
الطرقة
الضرابة
كل هذا في انتظار سلوى حتى ننعم بوجبة الافطار

الخمارة :العجين المر
الكنش :لسواطه العصيدة
الطرقة:ما يُعاس من الكسرة
الضرابة :الويكة ..
الباقي ما عرفتو حا اخليه لسلوى:bluefly:

ياسر عبدالرحمن خيري
24-03-2011, 08:30 AM
الاخت سلوي نشكرك علي المرور والاضافات الثره ونحن في انتظار المزيد خصوصا التدعيم بالصوره رائع جدا
بالمناسبه معظم هذه الاسماء نوبية
موضوع شيّق ورائع للغاية أخي حسن وأتفِق معك في نُوبِيّة معظم تلك الأسماء(بحكم لساني النُوبِي) بل يتعدى الأمر إلى وجود أسماء لمناطق متفَرِّقة بالسودان هي في الأصل أسماء نُوبِيّة
ويمكن الرجوع فيما يخص الموروث والعادات السودانِيّة القدِيمة لكتاب د/إبراهيم القرشي عادات سودانِيّة أُصولها عربيّة وهو كتاب مُتَفرّد وسلس لا يخلو من طرائف رائعة

حسن محمد
24-03-2011, 09:12 AM
شكرا ام ريان وياسر على انكم من تضيفون لهذا البوست رونقه وتلبسونه
الخرزه
والحريره
والضريره
وتجرتقو ,,,,,اضف الي ذللك اخ ياسر كتاب بروفسر عون الشريف (العاميه في السودان) ثر جدا في هذا الجانب

حسن محمد
24-03-2011, 01:28 PM
شوف النجرة دي
واحدة رسلت ولدها قالت ليه(بكري بكريك والكروة في الكراب جيب اللشفي فوق الباب)
رايكم شنو في القطع الاخضر وما هو التفسير

سلوى حسن جمبو
24-03-2011, 03:18 PM
http://www.elafoon.net/board/up/download.php?img=2517
الكنتوش
ماعون (إناء) بنجضوا فيه الأكل وهو مصنوع من الطين يعني فخار
يعني زي الحلةولكن هنالك بعض الكناتيش تستخدم لحفظ الالبان والحليب

http://www.elafoon.net/board/up/download.php?img=2516
ودة نوع من الكتوش حديث شوية مصنوع من الالمونيوم والبعض يسميه حلة تاتا ويستعمل فى عمل العصيدة والمعزة دى لاقية فرصتها فيه

http://www.elafoon.net/board/up/download.php?img=2518

حسن محمد
24-03-2011, 03:25 PM
الله يديك العافية ويخلي ليك اولادك
والله اروع من الروعة
المزيد....المزيد
احترامي لك

عبدالله التيت
24-03-2011, 03:25 PM
ياجماعة فى واحد بعرف الدُهليس (بضم الدال)

سلوى حسن جمبو
24-03-2011, 03:32 PM
التيبار هو الزيرويستعمل لحفظ الماء و تبريدها و يصنع من الفخار
وسماحة الشراب منه وخاصة فى الشتاء وزمان اهلنا بجيبوا جردل ويغطوه بفوطة ويقلبوا غطا الجردل بعد ما يقلعوا منه المسكة حقتوا ويختوه تحت الزير للنقاع او النقاط البنزل من الزير وبقولا الماء بكون انقى وخاصة ايام الماء يكون عكر دى فكرة سمحة شديد

http://www.elafoon.net/board/up/download.php?img=2519

حسن محمد
24-03-2011, 03:36 PM
التيبار هو الزيرويستعمل لحفظ الماء و تبريدها و يصنع من الفخار
وسماحة الشراب منه وخاصة فى الشتاء وزمان اهلنا بجيبوا جردل ويغطوه بفوطة ويقلبوا غطا الجردل بعد ما يقلعوا منه المسكة حقتوا ويختوه تحت الزير للنقاع او النقاط البنزل من الزير وبقولا الماء بكون انقى وخاصة ايام الماء يكون عكر دى فكرة سمحة شديد

http://www.elafoon.net/board/up/download.php?img=2519

اكرر اعجابي بمساهماتك

سلوى حسن جمبو
24-03-2011, 03:44 PM
ياجماعة فى واحد بعرف الدُهليس (بضم الدال)
غايتوا المعلومة البعرفها عنه هوحسب تقسيم المنزل بكون كمجلس للرجال ويسمى (الدهليس) وعادة تكون أمامه جلسة للرجال تسمى (البر زه
http://www.elafoon.net/board/up/download.php?img=2520

سلوى حسن جمبو
24-03-2011, 04:39 PM
دى حاجة رامياها القهوة وجهزتها بس لما صفتها من الشرقرق
اتذكرت اللشفى ماجابتها وعايزة ترسل ولدها وهو الكبير فيهم
بكري ولدى الكبير بكريك بديك هدية او بقشيش والكروة الهدية في الكراب
الكراب هو الحبل الذى يربط به العنقريب ويكون مفرقا وليس كنسيج باقى العنقريب ولانه كانوا بحتفظوا فيه بباقى القروش فيه
جيب اللشفي وتسمى ايضاً الليفة وهى توضع على فوهة الجبنة والغرض من هذه الليفة لتصفى القهوة
فوق الباب والليفة دى عشان ما تضيع منهم لما يغسلوا عدة القهوة بحتفظوا بيها فى مكان معين

رايكم شنو في القطع الاخضر القطع ما قطع فرامة قطع سكين ضراع سنييييينة وفيها قنطرة فضة
دايرين تفسير ماهو الشرقرق و ما هى قنطرة الفضة ؟؟؟؟

حسن محمد
24-03-2011, 05:20 PM
طبعا القنطره دي حقت ناس سنار ومشروع الجزيره لكن هناك قناطر شهيره بالعيلفون
اللشفي (اجابه غير صحيحه) دايره ليها مرة مشلخة
الكراب صاح بس وظيفة الكراب تكمن في اسمه

حسن محمد
24-03-2011, 05:23 PM
انت قاصدة قنطرة السكيييين؟

سلوى حسن جمبو
24-03-2011, 06:21 PM
انت قاصدة قنطرة السكيييين؟
بالظبط هى البتكون فى نهاية السكين
واللشفى هو مخرز المشاط وله سنة طويلة ونهاية خشبية { للأمانة استعنت بصديق وهى خالة لينا ومشلخة }

سلوى حسن جمبو
24-03-2011, 06:35 PM
• الريكة:
http://www.elafoon.net/board/up/download.php?img=2521
إناء من الحنقوق شبيه بالقفة الكبيرة، يستخدم أساساً لنقل قناديل العيش من ( الدببة ) المنتشرة في أنحاء ( البلاد ) إلى التقه أو ( الجرن ) ،يقول المثل السوداني: ( القندول القنقل الريكة )، وهناك نوع من الريكة يتخذ شكل الطبق ويستخدم لتوضع فيه الكسرة الرهيفة.

الطبق

http://www.elafoon.net/board/up/download.php?img=2522

ياسر عبدالرحمن خيري
24-03-2011, 06:44 PM
دى حاجة رامياها القهوة وجهزتها بس لما صفتها من الشرقرق
اتذكرت اللشفى ماجابتها وعايزة ترسل ولدها وهو الكبير فيهم
بكري ولدى الكبير بكريك بديك هدية او بقشيش والكروة الهدية في الكراب
الكراب هو الحبل الذى يربط به العنقريب ويكون مفرقا وليس كنسيج باقى العنقريب ولانه كانوا بحتفظوا فيه بباقى القروش فيه
جيب اللشفي وتسمى ايضاً الليفة وهى توضع على فوهة الجبنة والغرض من هذه الليفة لتصفى القهوة
فوق الباب والليفة دى عشان ما تضيع منهم لما يغسلوا عدة القهوة بحتفظوا بيها فى مكان معين

رايكم شنو في القطع الاخضر القطع ما قطع فرامة قطع سكين ضراع سنييييينة وفيها قنطرة فضة
دايرين تفسير ماهو الشرقرق و ما هى قنطرة الفضة ؟؟؟؟
أختي سلوى بوست أنيق أضفتم له ألقاً خاصاً....
أخي حسن في هذه الفترة القليلة لإنضمامكم للمنتدى أحدثتم به فرقاً... واصِل كما تريد
فنحن جميعاً نكاد نشِم عبق الموروث

حسن محمد
24-03-2011, 11:40 PM
بالظبط هى البتكون فى نهاية السكين
واللشفى هو مخرز المشاط وله سنة طويلة ونهاية خشبية {

للأمانة استعنت بصديق وهى خالة لينا ومشلخة }

ماقلتليك لازم مشلخة

صديق حسن الأمين
25-03-2011, 09:57 PM
التكل هو المطبخ قديماً بيت يصنع من القش والحطب بتم فيه الطهي للمأكولات السودانية
المحراكة هى عبارة عن حجرين كبيرين حجر طولي وثابت على الارض والثانى متوسط يطحن بهما الذرة لتصبح دقيق يعنى بدل الطاحونة الأن وايضاً تستخدم لطحن الفول السودانى ليصبح دكوة أى{زبدة الفول }

أقترح بان يسمى البوست {لغتنا العامية و مصطلحات سودانية}
إضافة :
التُكل يمكن يكون مبنى (سبيق)بناية بالسُريقة ومليس بالزبالة ،ولو تحسن الحال يمكن بناءه بالدانقيل .
المحراكة قد تكون من الخشب القوى أيضاً،وغالباً الحجرين متحركين.ومزقولات حدا فندك الويكة ,

حسن محمد
26-03-2011, 12:11 PM
كدة يا صديق ح نمرق من التكل ونمشي علي (المدماق)و(الكنيزير)و(الملطم)و(العرموس )وسلوي حتطلع برة اللعب وهي اهم لاعب
تحياتي

Abu mohamed
26-03-2011, 04:06 PM
كدة يا صديق ح نمرق من التكل ونمشي علي (المدماق)و(الكنيزير)و(الملطم)و(العرموس )وسلوي حتطلع برة اللعب وهي اهم لاعب
تحياتي
التَرويصة
القِده
والشنِيشة
والسِقاله
والحُمار
اب َراسين
والعَتله
القِمطة
والخَفجة

سلوى حسن جمبو
27-03-2011, 02:37 AM
التوار
كل هذا في انتظار سلوى حتى ننعم بوجبة الافطار
يا اهلنا ما تكروتو المنتفعين وطالبى المعرفة التوار ما جا لسع الجرتق خلوه شويه نضاير المطبخ
شكرا ام ريان وياسر على انكم من تضيفون لهذا البوست رونقه وتلبسونه
الخرزه
والحريره
والضريره
وتجرتقو


أختي سلوى بوست أنيق أضفتم له ألقاً خاصاً....
أخي حسن في هذه الفترة القليلة لإنضمامكم للمنتدى أحدثتم به فرقاً... واصِل كما تريد
فنحن جميعاً نكاد نشِم عبق الموروث

إضافة :
التُكل يمكن يكون مبنى (سبيق)بناية بالسُريقة ومليس بالزبالة ،ولو تحسن الحال يمكن بناءه بالدانقيل .
المحراكة قد تكون من الخشب القوى أيضاً،وغالباً الحجرين متحركين.ومزقولات حدا فندك الويكة ,
سبيق :بناء الطين يعنى مافى طوب
الزبالة:خلطة الطين الاخضر بمخلفات ذات انكر الاصوات والماعز ،
الدانقيل :الطوب الاحمر
مزقولات :مرميات او موضوعات قرب الاناء الخشبى الذى يدهس فيه البامية الناشفة الويكة وهو إنا من قطعتين من جزع شجرة مجوف من ناحية واحدة (الفُندك )وقطعة طويلة تضُرب بها الويكة لتصل لدرجة الطحين(يد الفندك)،
باقيلنا التوار والسُريقة ونتاكى باب التُكل ونستلف البرش الملون قبال الجرتق .

حسن محمد
27-03-2011, 07:42 AM
التوار من تور بتشديد الواو والراء قال فلان لفلان تورني اي قومني ان كان راقدا او نائماوالمصطلح يستخدم لخمارة العجين لانها تفعل بالعجين فعل( التتوير)والتطوير ايضا اي انه يتطور من (فطير)الى (خمير)وما يتبع ذلك من ارتفاع العجين الي اعلي(تتوير)
شكرا لكم جميعا وخليكم في التكل شوية لانو في اشياء في التكل كتيره ماقلناها

Abu mohamed
27-03-2011, 10:07 AM
احْبّبَت أنْ أُسَجِلْ إعجَابي بِهَذأ الْبَوستِ وَإلي الأمَامْ

حسن محمد
27-03-2011, 10:32 AM
دى حاجة رامياها القهوة وجهزتها بس لما صفتها من الشرقرق
اتذكرت اللشفى ماجابتها وعايزة ترسل ولدها وهو الكبير فيهم
بكري ولدى الكبير بكريك بديك هدية او بقشيش والكروة الهدية في الكراب
الكراب هو الحبل الذى يربط به العنقريب ويكون مفرقا وليس كنسيج باقى العنقريب ولانه كانوا بحتفظوا فيه بباقى القروش فيه
جيب اللشفي وتسمى ايضاً الليفة وهى توضع على فوهة الجبنة والغرض من هذه الليفة لتصفى القهوة
فوق الباب والليفة دى عشان ما تضيع منهم لما يغسلوا عدة القهوة بحتفظوا بيها فى مكان معين

رايكم شنو في القطع الاخضر القطع ما قطع فرامة قطع سكين ضراع سنييييينة وفيها قنطرة فضة
دايرين تفسير ماهو الشرقرق و ما هى قنطرة الفضة ؟؟؟؟

(ياولدي كرب بتشديد الراء
وظيفة الكراب هو القيام بشد و(تكريب)بقية النسيج وقتما احتاج لذلك وهي وظيفة متجددة
دحين خلونا نكرب شغلتنا دي

حسن محمد
29-03-2011, 08:52 AM
يا اهلنا ما تكروتو المنتفعين وطالبى المعرفة التوار ما جا لسع الجرتق خلوه شويه نضاير المطبخ



السريقة
سبيق :بناء الطين يعنى مافى طوب
الزبالة:خلطة الطين الاخضر بمخلفات ذات انكر الاصوات والماعز ،
الدانقيل :الطوب الاحمر
مزقولات :مرميات او موضوعات قرب الاناء الخشبى الذى يدهس فيه البامية الناشفة الويكة وهو إنا من قطعتين من جزع شجرة مجوف من ناحية واحدة (الفُندك )وقطعة طويلة تضُرب بها الويكة لتصل لدرجة الطحين(يد الفندك)،
باقيلنا التوار والسُريقة ونتاكى باب التُكل ونستلف البرش الملون قبال الجرتق .

السريقة بضم السين هى المدماق في البناء الحديث اي الدوره الواحدة في البناء بالطين وينتظر حتي تجف وتثبت حتي تبني فوقها سريقة اخري وهكذا

حسن محمد
31-03-2011, 01:30 PM
سؤال
لماذا ننشط في البداية ثم نتوقف فجاة ,حتي انني بدات اشك في فاعلية البوست اخص بالسؤال
سلوي , هاشم ,خيري,صديق,مهند,احمد,ام ريان, ابوحنينة
الاخت سلوي نحن في الانتظار بعد ما ضايرتي التكل
سلام

مرتضى دعوب
31-03-2011, 03:26 PM
بوست خطيييير و تالق واضح من الاخت سلوى و إلى الأمام يا جماعة و بالصور كمان ...

حسن محمد
31-03-2011, 03:31 PM
مشكور باشمهندس ونحن في انتظار مشاركتك وانتو اسياد( الدانقة)و(الضانقيل )

هاشم عبد الكريم
31-03-2011, 05:31 PM
شكرا لكم جميعا وخليكم في التكل شوية لانو في اشياء في التكل كتيره ماقلناها
سؤال
لماذا ننشط في البداية ثم نتوقف فجاة ,حتي انني بدات اشك في فاعلية البوست اخص بالسؤال
سلوي , هاشم ,خيري,صديق,مهند,احمد,ام ريان, ابوحنينة
الاخت سلوي نحن في الانتظار بعد ما ضايرتي التكل
سلام
وعليكم السلام اخونا حسن محمد(الكلونيا بعد المَّسخ الأرياح)
إجابة السؤال من طرفنا الحاجة سلوى قفلت باب التُكل وصنقرت فى التبروقة السراميك بعد ما أوقدت حبوبة ونسينى الكهربائية وإتلهت بالكراسات والكُتب -الشباب ممتحنين بإذن الله باقي ليهم يوم بالإضافة لإيقاد الصاج على البوتجاز الحمد لله ،والبعل مشغول بالمكتب شوية كِدا.
قالت باقيلها مضايرة التُكل ،ومالاقيه :
البُخسه ولا الدورايه وبعدهم تنفض المُخلايه والخُرتايه من الفرناغه ثم تضاير يد الفندك والماشه .
وتتاكى الباب من الدريفون المِعّلق الجلاده .

Dr.Mutasim I. Abdalnoor
02-04-2011, 07:53 AM
وعليكم السلام اخونا حسن محمد(الكلونيا بعد المَّسخ الأرياح)
إجابة السؤال من طرفنا الحاجة سلوى قفلت باب التُكل وصنقرت فى التبروقة السراميك بعد ما أوقدت حبوبة ونسينى الكهربائية وإتلهت بالكراسات والكُتب -الشباب ممتحنين بإذن الله باقي ليهم يوم بالإضافة لإيقاد الصاج على البوتجاز الحمد لله ،والبعل مشغول بالمكتب شوية كِدا.
قالت باقيلها مضايرة التُكل ،ومالاقيه :
البُخسه ولا الدورايه وبعدهم تنفض المُخلايه والخُرتايه من الفرناغه ثم تضاير يد الفندك والماشه .
وتتاكى الباب من الدريفون المِعّلق الجلاده .
الإجابة السفينة:ANSmile06:

حسن محمد
02-04-2011, 01:38 PM
الإجابة السفينة:ansmile06:


ح نشرح شرح عاوز شرح
صنقرت=اتوهطت
التبروقة=الفروة
الوناسة=فانوس جاز
الخُرتايه=يستعاض عنه بالصرار او الخلال
يد الفنك=يدالبن

سلوى حسن جمبو
02-04-2011, 05:23 PM
وعليكم السلام اخونا حسن محمد(الكلونيا بعد المَّسخ الأرياح)
إجابة السؤال من طرفنا الحاجة سلوى قفلت باب التُكل وصنقرت فى التبروقة السراميك بعد ما أوقدت حبوبة ونسينى الكهربائية وإتلهت بالكراسات والكُتب -الشباب ممتحنين بإذن الله باقي ليهم يوم بالإضافة لإيقاد الصاج على البوتجاز الحمد لله ،والبعل مشغول بالمكتب شوية كِدا.
قالت باقيلها مضايرة التُكل ،ومالاقيه :
البُخسه ولا الدورايه وبعدهم تنفض المُخلايه والخُرتايه من الفرناغه ثم تضاير يد الفندك والماشه .
وتتاكى الباب من الدريفون المِعّلق الجلاده .
صنقرت : أتوهطت او جلست تستعمل فى التعبير عن الجلوس لمناقشة أمر ما
التبروقة : هى المصلاية او برش الصلاة وتكون من السعف وغالبا ماتكون مستديرة

http://www.elafoon.net/board/up/download.php?img=2655


أوقدت: أشعلت او أضاءت
حبوبة ونسينى : المسرجه:هى لمبه صغيره وقودهاجازاو زيت وبها قيطان(من القطن)
يشعل فيضيء فتره طويله وكانت تسمى حبوبه ونسينى لانها كان يتم بها الانس فى الظلام(الكلام دا بدرى شويه)وتضاء داخل المنزل لان الهواء يطفئها. بالمناسبه الدخان بتاعها كتير.
النوع دة شوية حديث لانه النوع القديم غير متوفرة له صور
http://www.elafoon.net/board/up/download.php?img=2656

إتلهت : أنشغلت

سلوى حسن جمبو
02-04-2011, 06:05 PM
البُخسه : هي اناء من (القرع الناشف) يكثر فى منطقة ودالعباس شرق سنار وقديماً سمعنا بمقولة : قرع ودالعباس مية بقرش وماتين زيادة ، ويُكسى بالجلد يستعمل لخض الروب لصنع (الفرصة ) هي مثل الزبدة وتصبح فيما بعد سمناً.

http://www.elafoon.net/board/up/download.php?img=2658


وايضاً من استخدامات هذه البخسة انه يحفظ
فيها الطِعام بكسر الطاء وهو خليط من الشطة والملح والكزبرة والشمار
واحيانا ثوم مجفف, كذلك تحفظ فيها الاطعمة التي تنشف وتسحن .. كخليط الحلبة
والتمر ...
ودة شكل القرع قبل النضج :

http://www.elafoon.net/board/up/download.php?img=2662

سلوى حسن جمبو
02-04-2011, 06:12 PM
الدورايه:اناء فخاري لغلي اللبن {الحليب}
http://www.elafoon.net/board/up/download.php?img=2659

سلوى حسن جمبو
02-04-2011, 06:51 PM
المُخلاية. هى شوال يقطع نصف ويستعمل لحمل الاشياء والبعض من الجلد

http://www.elafoon.net/board/up/download.php?img=2661

الخُرتايه : مثل المخلايه ومصنوعة من القماش المتين ولها عدة اسماء اخرى
الفرناغة : الغبار الناعم

سلوى حسن جمبو
02-04-2011, 07:17 PM
فى جنوب النيل الأزرق والانقسنا بعملو بالقرع المجوف مزامير الوازا والآت للعزف

http://www.elafoon.net/board/up/download.php?img=2663

صديق حسن الأمين
02-04-2011, 08:13 PM
كدة يا صديق ح نمرق من التكل ونمشي علي (المدماق)و(الكنيزير)و(الملطم)و(العرموس )وسلوي حتطلع برة اللعب وهي اهم لاعب
تحياتي
صبرنا يا اخوى حسن ،لامن يضايورا هتش التكُل تب ،بس ما تنسو النطُع القديم داك جوه التُكل دا ما محله .

ياسر عبدالرحمن خيري
02-04-2011, 10:22 PM
والماشه .
.
الماشه : ما يُستَخدم في حمل وتحريك الجمر

ياسر عبدالرحمن خيري
02-04-2011, 10:30 PM
للإدارة:
أليس من الأصْوب نَقل هذا البوست من قسم الشكاوي والمقترحات إلى قسم آخر؟

سلوى حسن جمبو
02-04-2011, 11:34 PM
الماشه : ما يُستَخدم في حمل وتحريك الجمر
بارك الله فيك ، شوف دى بتشيل ليك الجمر وتتعلق فى غطاء البوتجاز !!!
http://www.elafoon.net/board/up/download.php?img=2669

صديق حسن الأمين
02-04-2011, 11:48 PM
أقترح بان يسمى البوست {لغتنا العامية و مصطلحات سودانية}
للإدارة:
أليس من الأصْوب نَقل هذا البوست من قسم الشكاوي والمقترحات إلى قسم آخر؟
كانت الشكوى فى البداية للإدارة بان الاجيال الحديثة لا تعرف معنى الكلمات ،والان صار الموضوع توثيقى ،عُلمت الشكوى ،وبقى تحديث العنوان ونقل الموضوع مع الشكر لكل المُتداخلين والمًستفيدين والمتاوقين .

سلوى حسن جمبو
02-04-2011, 11:57 PM
يد الفندك : اليد تكون اسطوانة حديدية او خشبية قطرها بوصة تقريباً وارتفاعها قدم تقريباً تستعمل مع الفندك لطحن البهارات والبن والفول وايضاً تكون من الخشب بحجم اكبر لطحن الويكة والبهارات لما تكون بكميات اكثر

http://www.elafoon.net/board/up/download.php?img=2671

فندك الخشب الكبير و الظاهر الحاجة دى عندها ويكة {ضرابة} مرسلاها للمغتربين

http://www.elafoon.net/board/up/download.php?img=2672

وهذا نوع مصنوع من النحاس يسمى الهون

http://www.elafoon.net/board/up/download.php?img=2673

وهذى صورة لفندك متوسط وآخر صغير ومعاهم اليد من حديد

http://www.elafoon.net/board/up/download.php?img=2674

سلوى حسن جمبو
03-04-2011, 12:00 AM
بوست خطيييير و تالق واضح من الاخت سلوى و إلى الأمام يا جماعة و بالصور كمان ...

لك الشكر على مرورك الطيب الذى زاد البوست القاً عيلفونى أصيل

سلوى حسن جمبو
03-04-2011, 12:13 AM
صبرنا يا اخوى حسن ،لامن يضايورا هتش التكُل تب ،بس ما تنسو النطُع القديم داك جوه التُكل دا ما محله .
هتش : أغراض كثيرة ومتنوعة
تب : كلمة دارجية بمعنى تاكيد بالكامل
النطُع : برش من السعف مستدير الشكل وبه فتحة من الوسط يستعمل لحفرة الدخان

http://www.elafoon.net/board/up/download.php?img=2675

جوه التُكل دا ما محله !!
داخل التُكل ياهو مكانه

حسن محمد
03-04-2011, 08:57 AM
فى جنوب النيل الأزرق والانقسنا بعملو بالقرع المجوف مزامير الوازا والآت للعزف

http://www.elafoon.net/board/up/download.php?img=2663
افيدونا
هل الالة الظاهره في الصورة هي الوازا؟

حسن محمد
03-04-2011, 09:01 AM
التبروقة غير البرش وهي من جلد الابقار والفروة تكون من جلد الضان ولكن ماهي (الركوة)التي ترافق التبروقة

ياسر عبدالرحمن خيري
03-04-2011, 09:05 AM
التبروقة غير البرش وهي من جلد الابقار والفروة تكون من جلد الضان ولكن ماهي (الركوة)التي ترافق التبروقة
الركوة إناء من الفخار مثل (الإبريق) يُستَخدَم لذات أغراضه

حسن محمد
03-04-2011, 09:11 AM
حقيقة اني اتضال امام هذا الابداع وعندما سجلت هذا البوست ماكنت اتوقع كل هذا الالق والابداع الانيق بل ماكنت اتوقع مداخلات اومشاركات يعني بالبلدي(سخلتكم) دخلت (سوكرتنا)
لكم الود

حسن محمد
03-04-2011, 09:17 AM
حقيقة اني اتضال امام هذا الابداع وعندما سجلت هذا البوست ماكنت اتوقع كل هذا الالق والابداع الانيق بل ماكنت اتوقع مداخلات اومشاركات يعني بالبلدي(سخلتكم) دخلت (سوكرتنا)
لكم الود

يعني البوست حق الاخت سلوي جاء عندي (ضهبان) في( قهبونة)

هاشم عبد الكريم
05-04-2011, 12:43 AM
افيدونا
هل الالة الظاهره في الصورة هي الوازا؟
نعم هى نوع من الوازا ونوع اخر يكون مثل البوق الطويل وكل واحدة تخرج نغمة مختلفة وبعزفهم مجتمعين بتواقيت متفاربة و متفاوتة تنتج النغمات
http://www.elafoon.net/board/up/download.php?img=2693

هاشم عبد الكريم
05-04-2011, 12:55 AM
(ياولدي كرب بتشديد الراء
وظيفة الكراب هو القيام بشد و(تكريب)بقية النسيج وقتما احتاج لذلك وهي وظيفة متجددة
دحين خلونا نكرب شغلتنا دي
قبال ما نكرب الشغله خلنا النفت ليهم العنقريب بعد ما إتوسر وقبال ما يطلعوه من التكل

http://www.elafoon.net/board/up/download.php?img=2697

سلوى حسن جمبو
05-04-2011, 01:10 AM
عنقريب مفصل وتحته تبروقة سعف

http://www.elafoon.net/board/up/download.php?img=2698

احمد الحبر
05-04-2011, 12:03 PM
للإدارة:
أليس من الأصْوب نَقل هذا البوست من قسم الشكاوي والمقترحات إلى قسم آخر؟

لجمال وروعة هذا البوست تم نقله الى المنتدى العام ..

سلوى حسن جمبو
07-04-2011, 01:04 AM
لجمال وروعة هذا البوست تم نقله الى المنتدى العام ..
مشكور أخى ودالحبر بارك الله فيك

مالك النور
07-04-2011, 05:14 AM
حقيقه بوست رائع جداً جداً عندي إضافه شئ إندثر أيضاً وتتطور وهو "القطيع" أي مخزن زمآآآآآآآآآآآن ,أتذكر واحده من حبوباتي كانت تبيع الفول والتسالي وكانت البطاعه هذه تُعبي في أكياس صُغار وكانت تضعها في القطيع ,وهو عباره عن مخزن مبني من الطين الإخضر ويكون داخل "العوضه" ويكون مُنحدر إلي اسفل ويُوضع به كل ما هو غالي وثمين وكان بابه من الخشب التقيل ويُقفل بي جنذير وطبله.ياريت ترجع هذه الاشياء الجميله والله كنا في قمة السعاده بيها وما كان في خوف زي اسي ,اسي مخزن مبني بنيان مُسلح وقفل حديث وبعد ده في سرقات وفي خوف.

هاشم عبد الكريم
07-04-2011, 03:38 PM
حقيقه بوست رائع جداً جداً عندي إضافه شئ إندثر أيضاً وتتطور وهو "القطيع" أي مخزن زمآآآآآآآآآآآن ,أتذكر واحده من حبوباتي كانت تبيع الفول والتسالي وكانت البطاعه هذه تُعبي في أكياس صُغار وكانت تضعها في القطيع ,وهو عباره عن مخزن مبني من الطين الإخضر ويكون داخل "العوضه" ويكون مُنحدر إلي اسفل ويُوضع به كل ما هو غالي وثمين وكان بابه من الخشب التقيل ويُقفل بي جنذير وطبله.ياريت ترجع هذه الاشياء الجميله والله كنا في قمة السعاده بيها وما كان في خوف زي اسي ,اسي مخزن مبني بنيان مُسلح وقفل حديث وبعد ده في سرقات وفي خوف.
نورت الموضوع بدخولك من بلاد ولاد سام ولو فى طريقة سويلك قطيع هناك حتى ولو فى طرف الحديقة ،وخزن فيه الدولارات الحارة الصُنع وغطيه بطرقة بيتزا حاره،
كدى شوف ياخوى الجبنه دى موهطه فى وقايتها وله ضهبانة ؟؟؟فالتكل لم تتم مضايرته تماماً ،ولو فتشت العيلفون كلها يمكن تلقى دانقه ،إلا نطع - ما بالساهل تب .

سلوى حسن جمبو
07-04-2011, 04:06 PM
كدى شوف ياخوى الجبنه دى موهطه فى وقايتها وله ضهبانة ؟؟؟فالتكل لم تتم مضايرته تماماً ،ولو فتشت العيلفون كلها يمكن تلقى دانقه ،إلا نطع - ما بالساهل تب .
http://www.elafoon.net/board/up/download.php?img=2853


فعلا الجبنه دى موضوعه فى الوقايه لزوم الصُحبة والإلفة،

حسن محمد
07-04-2011, 04:14 PM
الجبنة حديثة (وقايتها)منها وفيها
الوقاية تعبير في غاية الفصاحة ولا شنو ياخيري ده مجالك

مالك النور
07-04-2011, 05:03 PM
أشكرك الاخ هاشم علي تعليقك الظريف ,والدولار زي حلاوه قطن سهل المدغ يعني فكيت ليك ميه دولار في دقائق تتبخر مع إنها في السودان بتخدم غرض,المهم ذكرتني بي حكاية الجبنه دي الوالده العزيزه متعها الله بالصحه والعافيه ,الوالد كانوا معاهو جماعه جوا يشربوا معاهو القهوه فالوالد متعه الله بالصحه والعافيه أيضاً كان بهظر مع الوالده لما يكونوا معاهو جماعه بي موضوع العرس إنو داير يعرس تاني فالوالده بتتلخم شويه مره الجماعه قاعدين للقهوه فالوالد فتح موضوع المره التانيه فالوالده بقي بالها في كلام الوالد فعندها وقايه جديده خاتها للضيوف فبالخمه ختت الوقايتين مع بعض والمضحك الجديده بي تحت والقديمه بي فوق فالجماعه لما شافوها ضحكوا ضحك شديد وقالوا ليها الزول ده بهظر ساي,فلكم إحترامي الكلام ده ما تمشي تطبقو ياهاشم .

هاشم عبد الكريم
08-04-2011, 10:49 PM
فلكم إحترامي الكلام ده ما تمشي تطبقو ياهاشم .
حفظ الله الجميع ونتمى مرورك أكثر وماتنسى الوقايتين ،دكننهن فى المُخلاية،ولحين ما الطفل المِعِّلق الجَلاده يتُرمن حدا الباب نواصل بإذن الله .

تماضر
09-04-2011, 01:37 PM
صراحة يا جماعة :secret: ما لاحظت للمشكلة الا لما قريت البوست واول خمس كلمات التكل ،الطايوق،المعراكة،المحراكة واللداية عرفت اول كلمتين بس والباقين ما عرفت فيهم حاجة مع اني عايشة في السودان يعني المشكلة ما مشكلة المغتربين بس. نحن مقصرين ما في شك (يعني عيب علينا) لكن يمكن عندناعذر انو الناس بقت ما بتستعمل الكلمات دي في الحياة اليومية والفكرة جميلة جدا انو تكون توثيق لموروثاتنا
يديكم العافية

حسن محمد
09-04-2011, 01:50 PM
صراحة يا جماعة :secret: ما لاحظت للمشكلة الا لما قريت البوست واول خمس كلمات التكل ،الطايوق،المعراكة،المحراكة واللداية عرفت اول كلمتين بس والباقين ما عرفت فيهم حاجة مع اني عايشة في السودان يعني المشكلة ما مشكلة المغتربين بس. نحن مقصرين ما في شك (يعني عيب علينا) لكن يمكن عندناعذر انو الناس بقت ما بتستعمل الكلمات دي في الحياة اليومية والفكرة جميلة جدا انو تكون توثيق لموروثاتنا
يديكم العافية

الاخت تماضر كدي صنقري في (البنبر) ده ونكب ليك (البكري)( وتني) معانا وان اتوهطت لي عند (البركة) ياهو البندورو و(البغيتة)فضلت خيرك راقدة والبن حبشى

اختي نتمني ان تكوني ساعدا في نشر هذا التراث ولك الود
الاجابة عن ما ورد عند الاخت سلوي رمز الجبنة

تماضر
09-04-2011, 01:57 PM
والله كأنك بتتكلم معاي بالفرنسي شكلنا مفروض نجتهد شديد وهدي قعده

حسن محمد
09-04-2011, 02:10 PM
كددي (اتفنتي)عدييل خليني (انناغم)سلوي من (القطيع)
ياولد تعال خلي (الدودير) وناغم خالتك هسع دي (قهبونة)( دودير)

صديق حسن الأمين
09-04-2011, 02:37 PM
وتتاكى الباب من الدريفون المِعّلق الجلاده .
وبعد غيبة طويلة واعزرونا يا أهل ،
(لظروف العمل فى مكان محظورة فيه تكنلوجيا الإتصال):
تتاكى الباب :تقوم بإغلاقه جزئياً -يعنى ما تقفله للنهايه ،تترك فيه فرَقة رقراق للمتاوقة ،
الدريفون :الطفل الصغير وتستعمل الكلمة اكثر فى غرب السودان .
الجَلاده : فى قصيدة ليالى الأنُس (النفسُو مِسك وعرقو جَلاد ) الجلادة هى قطعة من مواد تصنيع البخور السودانى واعتقد انها من احد الحيوانات ما متأكد منه (تمساح-قط خلاء-ورل -حيون مائى) شكلها خشبى وعند وصول اى سائل اليها تتفاعل معه وتنتج رائحة زكيه ومحُببة ،وكانت تعلق على رقبة الطفل تتدلى على صدره لزوم تعطير رائحة العَرق أو رائحة اللُعاب النازل من الفم -بالبلدى(الريالة)
-ومن الطرائف ان هذه الجلادة تحتفظ بها الام للطفل حتى زواجه ويتم سحنها مع العطور السودانيه التى تهديها الام لزوجة إبنها -وأسألوا وتأكدوا من مجربين.

حسن محمد
09-04-2011, 02:46 PM
(المهيرة عقد الجلاد )
كما اسلف الاخ صديق الجلاد من كديس الخلاء
واسم فرقة عقد الجلاد ماخوذ من هذا التراث الشعبى

سلوى حسن جمبو
09-04-2011, 02:46 PM
وبعد غيبة طويلة واعزرونا يا أهل ،
(لظروف العمل فى مكان محظورة فيه تكنلوجيا الإتصال):
تتاكى الباب :تقوم بإغلاقه جزئياً -يعنى ما تقفله للنهايه ،تترك فيه فرَقة رقراق للمتاوقة ،
الدريفون :الطفل الصغير وتستعمل الكلمة اكثر فى غرب السودان .
الجَلاده : فى قصيدة ليالى الأنُس :(النفسُه مِسك وعرقهُ جَلاد ) الجلادة هى قطعة من مواد تصنيع البخور السودانى واعتقد انها من احد الحيوانات ما متأكد منه (تمساح-قط خلاء-ورل -حيون مائى) شكلها خشبى وعند وصول اى سائل اليها تتفاعل معه وتنتج رائحة زكيه ومحُببة ،وكانت تعلق على رقبة الطفل تتدلى على صدره لزوم تعطير رائحة العَرق أو رائحة اللُعاب النازل من الفم -بالبلدى(الريالة)
-ومن الطرائف ان هذه الجلادة تحتفظ بها الام للطفل حتى زواجه ويتم سحنها مع العطور السودانيه التى تهديها الام لزوجة إبنها -وأسألوا وتأكدوا من مجربين.
أخى صديق مشكور التوضيح وفعلاً ذى ما قلت عن الجلاد ولقد أهدتها لى الحاجة نفيسة رحمها الله {ام هاشم} وقالت لى دى جلادة هاشم لما كان صغير قلت لازم اعملها ريحة لعروسه واذكر تعليقى لها فى حينها قلت ليها{هو بعد ريالة ولدك فضل فيها ريحة }

عبدالله التيت
09-04-2011, 02:56 PM
والله ماشاء الله البوست ده ماشى مشى
هسى القال ليك انا سحرتو منو؟

حسن محمد
09-04-2011, 03:43 PM
والله ماشاء الله البوست ده ماشى مشى
هسى القال ليك انا سحرتو منو؟
يالتيت يولدي روق شوية انت مشرف ولا تمرجي مصحة ساكيني من عنبر اي عنبر

سلوى حسن جمبو
09-04-2011, 03:55 PM
سخلتكم : السخلة هى صغيرة الماعز يعنى بت المعزة والتيس واخت العتود
سوكرتنا: الزريبة او الحظيرة وهى المكان الذى يخصص للحيوانات وهو عبارة عن سياج جزء من الطوب {حائط} ومعه شبك حديدى
وفى الاسفل توجد سخلة داخل الزريبة او الحظيرة ومعها امها المعزة


http://www.elafoon.net/board/up/download.php?img=2787
حاشية: عندنا فى السودان بقولوا أغنام لكن الصحيح نقول ماعز لان الأغنام هى الخرفان

سلوى حسن جمبو
09-04-2011, 04:13 PM
يعني البوست حق الاخت سلوي جاء عندي (ضهبان) في( قهبونة)
ضهبان : الشخص التايه {رايح} عايز يدلوه على المكان الصحيح
قهبونة : الحر الشدييييييييد

سلوى حسن جمبو
09-04-2011, 04:22 PM
والله ماشاء الله البوست ده ماشى مشى
هسى القال ليك انا سحرتو منو؟
حاشا عليك عينك بااااااااااردة
جر البمبر دااااااااك واقعد اشرب معانا فنجان قهوة

صديق حسن الأمين
09-04-2011, 04:23 PM
سخلتكم : السخلة هى صغيرة الماعز يعنى بت المعزة والتيس واخت العتود


سوكرتنا: الزريبة او الحظيرة وهى المكان الذى يخصص للحيوانات وهو عبارة عن سياج جزء من الطوب {حائط} ومعه شبك حديدى
وفى الاسفل توجد سخلة داخل الزريبة او الحظيرة ومعها امها المعزة


http://www.elafoon.net/board/up/download.php?img=2787

حاشية: عندنا فى السودان بقولوا أغنام لكن الصحيح نقول ماعز لان الأغنام هى الخرفان

إياهوو زاتو القول والمعنى البعيد :(السخله قبال تبقى تقره والعتود قبال يبقى تيس ،المعلومة هناك اكثر من هنا ،يعنى زى ما بقولوا أولاد الريف فى زول ببيع فى المويه فى حارة السقايين ،
وهذا تعبير بليغ بمعنى طلب العلم وزيادة المعرفة بتواضع من الاخ حسن .

مالك النور
09-04-2011, 04:28 PM
بمناسبة الأغنام والماعز في زول شِرب منكم اللِبه و"اللِبه"هو لبن بحلبو من الماعز مُباشره بعد ما تلد ويسخن في النار ويكون شكله زي اللبن المقطع ويُضاف إليه قليلاً من الملح وكنا نأكله ونحرس الحله لمن تفور"من نارو وأفتلو"وكانت وجبه دسمه.

صديق حسن الأمين
09-04-2011, 04:29 PM
التكل دا كان ما وريتونا وين بتختو الكُشر -ماتقفلوا الباب ،

ياسر عبدالرحمن خيري
09-04-2011, 04:33 PM
التكل دا كان ما وريتونا وين بتختو الكُشر -ماتقفلوا الباب ،
الكُشر مفردة من (الرطانة) النوبيّة القحة وهي تعني المفتاح علماً بأن ليس كل مفتاحٍ كُشر...

حسن محمد
09-04-2011, 04:35 PM
سخلتكم : السخلة هى صغيرة الماعز يعنى بت المعزة والتيس واخت العتود
سوكرتنا: الزريبة او الحظيرة وهى المكان الذى يخصص للحيوانات وهو عبارة عن سياج جزء من الطوب {حائط} ومعه شبك حديدى
وفى الاسفل توجد سخلة داخل الزريبة او الحظيرة ومعها امها المعزة


http://www.elafoon.net/board/up/download.php?img=2787
حاشية: عندنا فى السودان بقولوا أغنام لكن الصحيح نقول ماعز لان الأغنام هى الخرفان
شكرا للاخت سلوي والمجموعة صحيح ان السوكرة هي الزريبة لكنها زريبة من نوع خاص وهي اشبه بالسجن حيث تحبس فيها البهائم التي تتعدي علي زراعة الاخرين نتيجة اهمال اصحابها ولاتخرج الا بعد ان يدفع صاحبها غرامة ولعل الكلمة تركية وهي ثقافة كانت سائدة في العهد التركي والي وقت قريب قبل عهد السرامييك
والله يكافينا شر السوكرة

صديق حسن الأمين
09-04-2011, 04:37 PM
بمناسبة الأغنام والماعز في زول شِرب منكم اللِبه و"اللِبه"هو لبن بحلبو من الماعز مُباشره بعد ما تلد ويسخن في النار ويكون شكله زي اللبن المقطع ويُضاف إليه قليلاً من الملح وكنا نأكله ونحرس الحله لمن تفور"من نارو وأفتلو"وكانت وجبه دسمه.
يا حليلو اللبِا اللونه أبيض مُخضر يا اخونا مالك ، و يا حليلها الجُمادة التقيله البقت يطلعوها بمنديل ورق وبإشمئزاز .
ومع الاشواق والتحايا

عبدالله التيت
09-04-2011, 04:38 PM
الفرق بين العبلوب والعتوت شنو؟

سلوى حسن جمبو
09-04-2011, 04:45 PM
بمناسبة الأغنام والماعز في زول شِرب منكم اللِبه و"اللِبه"هو لبن بحلبو من الماعز مُباشره بعد ما تلد ويسخن في النار ويكون شكله زي اللبن المقطع ويُضاف إليه قليلاً من الملح وكنا نأكله ونحرس الحله لمن تفور"من نارو وأفتلو"وكانت وجبه دسمه.
أخى مالك اللبة بتاكل ما بتشرب ذى ماقلت وهوحليب الماعز او الاغنام بعد ان تلد صغارها واللبة بكون لمدة ثلاثة ايام او اربعة ما بشربوه لانة اول مايسخن على النارمع شوية ملح بتكور ويبقى ذى الجبنة لكن طعمه ليس حامض وكنا ننتظره بفارغ الصبر وكنا لما نشوف اهلنا جابوا العيش {الذرة}وقاموا بغليه ذى البليلة هنا نعرف ان المعزة على وشك ان تضع صغيرها

مالك النور
09-04-2011, 04:49 PM
أخواني الأعزاء مع إحترامي لكم أعرج بكم قليلاً ولا مؤاخذه ونخش في الأحذيه القديمه التي إندثرت مثلاً شبشب "تموت تخليه"وهو يُصنع من اللستك بتاع العربيه ويتُخيل لي سُمي بهذا الإسم لأنك تلبسه لا قدر الله لمن تموت ما يتقطع وذلك لقوته,وأيضاً "الشِقيانه"وهي تُصنع من الجلد وقبل أن تُلبس تُوضع في الزيت لفتره زمنيه مُحدده وتكون واطيه جداً ولكنها تعيش فتره طويله وخفيفه وشكلها زي الشبشب اب رباض حالياً ومن أشهر الدكاكين التي كانت مشوره ببيع شبشب "تموت تخليه"دكان عمنا حسن الامين أبوصالح بأُم قحف متعه الله بالصحه والعافيه,ولكم إحترامي.

عبدالله التيت
09-04-2011, 04:58 PM
ونخش في الأحذيه القديمه إحترامي.
(دكتور شول)شبشب مسطح له وشية جلدية ،كان بجى زمان من ليبيا ، له نوعان واحد بأرضية بلاستكية والتانى بأرضية خشب على ماأعتقد ، الله اعلم

حسن محمد
09-04-2011, 05:03 PM
الكُشر مفردة من (الرطانة) النوبيّة القحة وهي تعني المفتاح علماً بأن ليس كل مفتاحٍ كُشر...
وين انت يعنى الا نرطن
بالمناسبة اخر باب يقفل باالكُشر في العيلفون كان بيت عمنا خالد محمد عيسي (ود دنقلا) الي اوائل التسعينات كان موجود اتمني ان يكون موجود للحين

سلوى حسن جمبو
09-04-2011, 05:07 PM
التكل دا كان ما وريتونا وين بتختو الكُشر -ماتقفلوا الباب ،
الكُشر : هو من الأبواب القديمة والمصنوعة من خشب السنط الثقيل وسمي بالكشر لأن له مفتاحاً مصنوع من نفس الخشب والكشر هو المفتاح بلغة الدناقلة فكانت التسمية.

حسن محمد
09-04-2011, 05:07 PM
أخى مالك اللبة بتاكل ما بتشرب ذى ماقلت وهوحليب الماعز او الاغنام بعد ان تلد صغارها واللبة بكون لمدة ثلاثة ايام او اربعة ما بشربوه لانة اول مايسخن على النارمع شوية ملح بتكور ويبقى ذى الجبنة لكن طعمه ليس حامض وكنا ننتظره بفارغ الصبر وكنا لما نشوف اهلنا جابوا العيش {الذرة}وقاموا بغليه ذى البليلة هنا نعرف ان المعزة على وشك ان تضع صغيرها
وايضا يتبقي سائل مائي اخضر فاتح ويكون قليل جدا في اللبة

حسن محمد
09-04-2011, 05:19 PM
الفرق بين العبلوب والعتوت شنو؟
قصدك العمبلوك والعتود
ذي الفرق بين الجني والشافع

عبدالله التيت
09-04-2011, 05:23 PM
قصدك العمبلوك والعتود
ذي الفرق بين الجني والشافع
يعنى مافى فرق فى العمر!
مع انو مُصر على نطقهما عبلوب وعتوت!

حسن محمد
09-04-2011, 05:30 PM
أنت عظيم يا عم حسن في الوصف الدقيق !!

وتمتلك أيضاً عقلية عبقرية جبارة أحييك عم حسن !!
شكرا ايها الرجل وكتر عشان صاحبك التيت ده يرحمنا شوية
بالمناسبة عقلية (جبارة) دي شكر ولا ذم ؟

حسن محمد
09-04-2011, 05:46 PM
أبشر ياعم حسن وان شاءالله اكون عند حسن ظنك !

بره الخط

بالمناسبة الناقة بتاعتك أخباره شنو ؟؟

صدقني لاناقة لي فيها ولا جمل

Abu mohamed
09-04-2011, 05:55 PM
صدقني لاناقة لي فيها ولا جمل
آسف ياعمي (استعجلتا) ..

تخريمة

انا ح شيل الكلام الكتبتو انا فوق ده كلو عشان ما ابوظ ليك البوست الجميل ده ولك العتبي ياعمي حسن حتي ترضي .

حسن محمد
09-04-2011, 06:09 PM
آسف ياعمي (استعجلتا) ..

تخريمة

انا ح شيل الكلام الكتبتو انا فوق ده كلو عشان ما ابوظ ليك البوست الجميل ده ولك العتبي ياعمي حسن حتي ترضي .
لا والله خليهو بالعكس استراحة جميلة ومفيدة

حسن محمد
09-04-2011, 06:33 PM
لا والله خليهو بالعكس استراحة جميلة ومفيدة
ما دام دخلتونا الزريبة كدي دحين جيبوا لي (البعامية) دي عشان( نصررا)
(والكرتة) دي لبسوها (الخرتاية) والسخيل ننجرلو (خلال)وجيبو لي( كوليقة)النختها ليهم

سخلتكم : السخلة هى صغيرة الماعز يعنى بت المعزة والتيس واخت العتود
سوكرتنا: الزريبة او الحظيرة وهى المكان الذى يخصص للحيوانات وهو عبارة عن سياج جزء من الطوب {حائط} ومعه شبك حديدى
وفى الاسفل توجد سخلة داخل الزريبة او الحظيرة ومعها امها المعزة
كدي بعد حيطة الغنم دي يا سلوي ياختى شوفي لي (الجداد) ده مالو ماسامعن ليو حس يكون ضربو (سمير) وشايفنو (مهيم) كدي نضفوا القفص


http://www.elafoon.net/board/up/download.php?img=2787
حاشية: عندنا فى السودان بقولوا أغنام لكن الصحيح نقول ماعز لان الأغنام هى الخرفان

عيًِلفونيُة وأفتًخٍر.!
09-04-2011, 09:16 PM
بوست جميل وممتع وموفق نتمني لقدام ان نفيد ونستفيد
تقبلو مروري

تماضر
10-04-2011, 12:24 AM
كددي (اتفنتي)عدييل خليني (انناغم)سلوي من (القطيع)
ياولد تعال خلي (الدودير) وناغم خالتك هسع دي (قهبونة)( دودير)
الحقونا بالترجمة

الصديق السر
10-04-2011, 12:40 AM
http://www.elafoon.net/board/up/download.php?img=2787

حاشية: عندنا فى السودان بقولوا أغنام لكن الصحيح نقول ماعز لان الأغنام هى الخرفان



كوكوكوكوكو
ازيكم
ها ناس هاااااااااااا كيفنكم
شنو لابتين كده
ماكلمتونا بي لمتكم دي
لقيت الباب متاكه دفرتو وخشيت
لكن يا سلوي شكلك كده قبيل هزيتي السعن ولميتي الفرصه وخليتي لينا بس الرائب ؟
عشان كده مستعجله عايزه تقفلي التكل وتكلفتينا ساي حتي اللبانه شلتيها معاي مع اني لما شفت التقره بتاعتكم دي جريت جبت البستله قلنا نلحق لينا حلبه لي شاي المغرب المقنن لان حلتنا مازالت بي كدابها

اها يا هاشم اخوي لقيتني كييييييييييف !!!!

عبدالله التيت
10-04-2011, 02:21 AM
ما دام دخلتونا الزريبة كدي دحين جيبوا لي (البعامية) دي عشان( نصررا)
(والكرتة) دي لبسوها (الخرتاية) والسخيل ننجرلو (خلال)وجيبو لي( كوليقة)النختها ليهم


ياكونيا وضح لينا اكتر
للبعامية والكرتة والخرتاية ونصررا وننرجلو، الكلمات دى عاوزة شرح اكتر حتى نستفيد ،الكليقة دى بعرفا ربطة القش او البرسيم .

هاشم عبد الكريم
10-04-2011, 02:35 AM
ياكونيا وضح لينا اكتر
للبعامية والكرتة والخرتاية ونصررا وننرجلو، الكلمات دى عاوزة شرح اكتر حتى نستفيد ،الكليقة دى بعرفا ربطة القش او البرسيم .
الاخ العزيز التيت هنا تكمن روعة التوضيح فى شرح يحتاج لشرح اخر ، فهدفنا جميعاً الحصول على اكبر قدر من المعلومات عن الكلمات الدارجة والتى قل إستعمالها ،ونود توثيقها وجمعها فى هذا البوست ،
ولك جزيل الشكر على مداخلتك الثرة .

حسن محمد
10-04-2011, 09:22 AM
--------------------------------------------------------------------------------

كدي ياهاشم شوفو بتنا المتفنة ليها ساعة دي وبعدين نشوف التيت

حسن محمد
10-04-2011, 09:26 AM
الاخ العزيز التيت هنا تكمن روعة التوضيح فى شرح يحتاج لشرح اخر ، فهدفنا جميعاً الحصول على اكبر قدر من المعلومات عن الكلمات الدارجة والتى قل إستعمالها ،ونود توثيقها وجمعها فى هذا البوست ،
ولك جزيل الشكر على مداخلتك الثرة .

الحقونا بالترجمة
كدي يا هاشم شوف بتنا المتفنة ليها ساعة دي وبعدين نرجع للتيت

حسن محمد
10-04-2011, 09:32 AM
كوكوكوكوكو
ازيكم
ها ناس هاااااااااااا كيفنكم
شنو لابتين كده
ماكلمتونا بي لمتكم دي
لقيت الباب متاكه دفرتو وخشيت
لكن يا سلوي شكلك كده قبيل هزيتي السعن ولميتي الفرصه وخليتي لينا بس الرائب ؟
عشان كده مستعجله عايزه تقفلي التكل وتكلفتينا ساي حتي اللبانه شلتيها معاي مع اني لما شفت التقره بتاعتكم دي جريت جبت البستله قلنا نلحق لينا حلبه لي شاي المغرب المقنن لان حلتنا مازالت بي كدابها

اها يا هاشم اخوي لقيتني كييييييييييف !!!!
انت فاضي من (التيوة) قاعد (تضقل) ساي مع ناس سكوها وكردوها وجروا وراها عرفتها شنو (الجلدة) اها ليقيتنا كيف(جكسا) عديييل كدة مع انو خليناها من زمن (الشراب)

Abu mohamed
10-04-2011, 11:44 AM
موْضوع جداً راقِي والْحوار المُتبادل الذي دَار بينكمْ كان الأروع والأحلا والأجمل وأنا سعيد بين ارجاء هذأ المُنتدي وهذأ الفنْ العِملاق الذي يحمل كثيراً من الثقافات السُودانية والتُراثيّة والحَّضارية التي اصْبحَت مندثرةٌ وقليلةٌ في يومِنا هَذأ التّحية لكَ الأخ حَسن وانتَ نحلةُ المنتدي تطيرُ منْ مكان إلي مكانٍ آحر تتْحفُنا دوماً باِسلوبكَ الرّاقي والرّفيع الذي يُثير الدّهشة والإعجابْ ويُريح الْنِفوس .

الصديق السر
10-04-2011, 01:18 PM
انت فاضي من (التيوة) قاعد (تضقل) ساي مع ناس سكوها وكردوها وجروا وراها عرفتها شنو (الجلدة) اها ليقيتنا كيف(جكسا) عديييل كدة مع انو خليناها من زمن (الشراب)

يادكتور معتصم حسن كلونيا دقا التيوة معاكم في حوش باشري
والا ضقيلوا دا في صفحات المنتدي ساي زينا نحنا كده!!!
نحنا غايتو كرة الشراب دي لعبنا بيها (كمبلت ) بي علب الصلصة وحصلنا كمان الضقل .
لكن اجمل العابنا كانت بي الضراب الكبير نخرت ابو اربعة وردات ونخاف من الجلة عشان ما تدشدشو ولو طقشتو بتشرم خاصة لو دقو نظر لانو لو بقا مشرم ما عندو قيمة . واجل حاجة انك تتباهي بيهو لما تخرتو من اصحابك.

.



اها يا ابو علي لقيتني كييييييييييييف!!!

حسن محمد
10-04-2011, 01:36 PM
يادكتور معتصم حسن كلونيا دقا التيوة معاكم في حوش باشري
والا ضقيلوا دا في صفحات المنتدي ساي زينا نحنا كده!!!
نحنا غايتو كرة الشراب دي لعبنا بيها (كمبلت ) بي علب الصلصة وحصلنا كمان الضقل .
لكن اجمل العابنا كانت بي الضراب الكبير نخرت ابو اربعة وردات ونخاف من الجلة عشان ما تدشدشو ولو طقشتو بتشرم خاصة لو دقو نظر لانو لو بقا مشرم ما عندو قيمة . واجل حاجة انك تتباهي بيهو لما تخرتو من اصحابك.

.



اها يا ابو علي لقيتني كييييييييييييف!!!
غايتو بتداقش معانا لوكنت حاضر التلفون الكان في دكان ابوك.
موضوع الالعاب الشعبية موضوع مهم جدا وسوف نفرد له جانبا في هذا البوست
الاخت سلوي دخلت (الزريبة) وما مرقت لسع اظنها خشت قفص (الجداد) باقي ضاربو (هيم) والليلة ماسامع ليهو صوت اوعي يكون ضربوا (سمير) غايتو انتظر شوية خليها تلقط (جني جداد) (خلينا نتريق)

عائشة الفاتح
10-04-2011, 01:41 PM
سلامااااااااااات . .
إتفنت و قريت البوست و إكتشفت إكتشاف خطير جداً : إني ما سودانية :wa2o:
واااااا خجلتااااااه , , و أنا القلت أدخل معهد لغات لقيت معهد قدامي , ,
تسلم أخ حسن على الموضوع الرائع , , و تسلموا أهلي الطيبين على مداخلاتكم المفيدة . .

حسن محمد
10-04-2011, 01:47 PM
سلامااااااااااات . .
إتفنت و قريت البوست و إكتشفت إكتشاف خطير جداً : إني ما سودانية :wa2o:
واااااا خجلتااااااه , , و أنا القلت أدخل معهد لغات لقيت معهد قدامي , ,
تسلم أخ حسن على الموضوع الرائع , , و تسلموا أهلي الطيبين على مداخلاتكم المفيدة . .
حبابك عشرة وشوفي خالتك سلوي بتجيهك تب

عبدالله التيت
10-04-2011, 02:49 PM
ياكونيا وضح لينا اكتر
للبعامية والكرتة والخرتاية ونصررا وننرجلو، الكلمات دى عاوزة شرح اكتر حتى نستفيد ،الكليقة دى بعرفا ربطة القش او البرسيم .
ياكلونيا اشرح لينا الحاجات دى

سلوى حسن جمبو
10-04-2011, 04:11 PM
كددي (اتفنتي : جاية من إتفن اى إفترش الجلوس أرضاً
عدييل خليني (انناغم : جاية من نغمة اى المناداة بصوت مرتفع وفيه شبه النغمة الموسيقية تقريباَ
سلوي من (القطيع : وهو عباره عن مخزن مبني من الطين الإخضر ويكون داخل "العوضه" ويكون مُنحدر إلي اسفل ويُوضع به كل ما هو غالي وثمين وكان بابه من الخشب التقيل ويُقفل بي جنذير وطبله.
ياولد تعال خلي (الدودير : نوع من الالعاب تقريباً { غير متاكدة منها}
وناغم خالتك هسع دي (قهبونة : الحر الشديد
( دودير)

حسن محمد
10-04-2011, 04:18 PM
ماهو الفرق بين( التتفن )و (الصنقير)

سلوى حسن جمبو
10-04-2011, 06:18 PM
السحارة : صندوق كبير لحفظ الاشياء القيمة و من ادوات العروس الأساسية

http://www.elafoon.net/board/up/download.php?img=2792

فليوقد : يشعل النار ويولعها

سلوى حسن جمبو
10-04-2011, 06:26 PM
الرتينة : مصباح يعمل بالكروسين ذو اضاءة عالية مقارنة بسلفه من أدوات الانارة

http://www.elafoon.net/board/up/download.php?img=2793

تامرازهرى الصديق خير
10-04-2011, 08:22 PM
والله بوست في غاية الروعه ... والواحد بعد ماقرا المصطلحات دي طلع زيروووووووووووووو ... يسلموا

تماضر
11-04-2011, 12:26 AM
(القطيع : وهو عباره عن مخزن مبني من الطين الإخضر ويكون داخل "العوضه" ويكون مُنحدر إلي اسفل ويُوضع به كل ما هو غالي وثمين وكان بابه من الخشب التقيل ويُقفل بي جنذير وطبله.

بس ما تضحكوا علي كنت مفتكرة القطيع يعني قطيع الحيوانات:dai5:
غايتو انا وعشوش دي اول المسجلين في الكورس ده
اها الرسوم كم ؟

حسن محمد
11-04-2011, 09:32 AM
بس ما تضحكوا علي كنت مفتكرة القطيع يعني قطيع الحيوانات:dai5:
غايتو انا وعشوش دي اول المسجلين في الكورس ده
اها الرسوم كم ؟
نعم القطيع هو مجموعة الحيوانات ولكن مارائك ان تدينا الكلمة المرادفة لها بالانجليزي ومعانيها
ثانيا القطيع في العامية السودانية ربما لانها جزء مستقطع من المبني الاصلي لغرض التخزين والله اعلم

عبدالله التيت
11-04-2011, 12:07 PM
الكرارك هى اعواد الاشجار بعد قطعها وبترها وتستعمل فى بناء الرواكيب

احمد الحبر
11-04-2011, 12:43 PM
أم دقوقه وما أدراك ما أم دقوقه !!
نتمنى من الدكتورة عائشة والدكتورة تماضر يُحدثونا عن أم دقوقه وياريت كمان ويلقوا لينا الضوء عن أخر ما توصل له العلم بخصوص هذا المصل الهام !!!:ANSmile09:

تماضر
11-04-2011, 01:51 PM
نعم القطيع هو مجموعة الحيوانات ولكن مارائك ان تدينا الكلمة المرادفة لها بالانجليزي ومعانيها
ثانيا القطيع في العامية السودانية ربما لانها جزء مستقطع من المبني الاصلي لغرض التخزين والله اعلم
aflock of sheep
herd of cows
cattle

تماضر
11-04-2011, 01:57 PM
أم دقوقه وما أدراك ما أم دقوقه !!
نتمنى من الدكتورة عائشة والدكتورة تماضر يُحدثونا عن أم دقوقه وياريت كمان ويلقوا لينا الضوء عن أخر ما توصل له العلم بخصوص هذا المصل الهام !!!:ansmile09:
هسه في داعي للاحراج !!! دي لسه ما ادونا ليها ...ممكن الاستعانة بصديق او مساعدة الجمهور ؟

um rayan
11-04-2011, 02:21 PM
هسه في داعي للاحراج !!! دي لسه ما ادونا ليها ...ممكن الاستعانة بصديق او مساعدة الجمهور ؟
ام دقوقة دي ملاح الويكة زمان كان بدقو اللحم والبصل في الفندك .....

حسن محمد
11-04-2011, 02:27 PM
aflock of sheep
herd of cows
cattle


ام دقوقة دي ملاح الويكة زمان كان بدقو اللحم والبصل في الفندك .....
اذا ماهي ام شيعيفة وام تكشو وام رقيقة وام بقبق وبقية الرتل من الامهات مع العلم معظمهم ابناء خالتنا الويكة الله يديها العافية

um rayan
11-04-2011, 03:31 PM
اذا ماهي ام شيعيفة وام تكشو وام رقيقة وام بقبق وبقية الرتل من الامهات مع العلم معظمهم ابناء خالتنا الويكة الله يديها العافية
ام رقيقة معروفة للجميع وام شعيفة اخت ام رقيقة بس من غير لحم بتتعمل بموية وبصل وبهارات فقط
ام تكشو :ملوخية ناشفة تتسحن او تندق ويضاف ليها الويكة

حسن محمد
11-04-2011, 03:36 PM
ام رقيقة معروفة للجميع وام شعيفة اخت ام رقيقة بس من غير لحم بتتعمل بموية وبصل وبهارات فقط
ام تكشو :ملوخية ناشفة تتسحن او تندق ويضاف ليها الويكة
وين ام بقبق

سلوى حسن جمبو
11-04-2011, 04:05 PM
أم بقبق : ملاح بامية تقال لويكة الخلا
اخونا حسن هل الاجابة صحيحة؟

حسن محمد
11-04-2011, 04:10 PM
أم بقبق : ملاح بامية تقال لويكة الخلا
اخونا حسن هل الاجابة صحيحة؟
نعم هي البامية المفروكة

سلوى حسن جمبو
11-04-2011, 04:20 PM
وأهديكم بعض الأكلات السودانية والأغلب منها من ثقافة أهل الغرب وبعضها بمنطقة النيل الأزرق وأكيد حترجع ذاكرة البعض الى الوراء اربعة عقود ونيف وتذكرهم بحجوة فاطمة السمحة والغولة والتى اكلت من طعام اعدته الغولة لصويحبات فاطمة السمحة فلم يأكلن منه واكلت فاطمة لكنها لم تقدر على المشى ولعل هذه الوجبات القديمة هى بعض مما ورثناه قبل عصر عولمة السندوتشات وعصرنة الزبادى

ملاح الانقارا
يتكون من ورق نبات الكركدي بالاضافة للفول السوداني وعطرون ودقيق وهو ملاح لذيذ الطعم

ملاح الكمبو
بلهجة اهلنا فى الوسط هو الويكاب بأقسامه المنشطرة انشطار ثنائى بين اللوبا واللبن وبعض بيوت الحسانية يسمونه ملاح الشيطان
تحرق سيقان الذرة وعندما تتحول لرماد يؤخذ رمادها ويضاف له لوبيا ولبن
العفوص
وهو عبارة عن سلطة مثل الجرجير يتكون من ورق أشجار التبلدي وتضاف له الدكوة والبصل
سناكيلو
وهو ملاح يتكون من دقيق وسمك جاف
ملاح مطيعينة
ويعمل من اللبن وتضاف له الويكة الجافة
أم دفان
او الملالة كما يسميها البعض كانت عند رعاه الابقار من عربان وام برروا عقب موسم الحصاد فى مناطق اقدى والقرابين وام كشو
وهو طعام يتكون من دقيق مخلوط باللبن ويدفن تحت النار حتى ينضج
أم شيشة
وهو عصيدة تتكون من دقيق الدخن ويضاف لها السمسم وزيت ولا تحتاج لنار تؤكل هكذا دون قلي (أممممم)
ضوّاك
عصيدة تتكون من ذرة تطحن وتضاف اليها دكوة
نتقق
وهي وجبة تتكون من الجراد يحمر بالزيت ويؤكل كالتسالي
ولدول
هو نبات يقوم في الترع والخيران ويؤخذ ورقه ويضاف له لحم جاف وبصل
قاسيا
نوع من الشجر في ورقه يضاف له الفول السوداني ويضاف أيضا اللحم الجاف
الكراد
نبات من فصيلة الفاصوليا يضاف له لحم وطماطم ويسمى أيضا دونيب
ويرتق
تعمل من بذور نبات الكركدي تبل وتخمر وتضاف لها الويكة وكمبو وبصل
أم حليبين
هي دقيق يخلط باللبن ويعمل قراصة تؤكل باللبن أيضا
سد الحنك
دقيق ذرة أو قمح يغلى في النار و يضاف له السكر
سمرونا
وهي تحلية بعد الوجبات تتكون من دقيق وسكر و سمن وهي مثل البسبوسة
بجبجي
وهو عبارة عن مديدة تصنع من لب حب البطيخ

أم جقوقة
تتكون من السمسم الذي يعصر في العصارة قبل أن يتحول لأُمباز

حسن محمد
11-04-2011, 04:21 PM
اما (الدودير) فهي كلمات مسجوعة مموسقة يترنم بها الشافع بعد مايضع(القلوبية) ويلبت ويدودر اعتقادا منه انها تجلب الطيور للشرك
(نسال الاخ هاشم كان بدودر كيف)
ويقال دودرت فلان في الكلام اي اتي به لما يريد

مالك النور
11-04-2011, 04:24 PM
اخواني اسألكم في واحد منكم قعد مع الوالده جنب الصاجن وإستناها لمن عاست "اللُقمه" وأدتو "الشيط"والشيط ده باقي العجين البكون ماسك في الصاجن بعد ما الوالده تتطلع "اللُقمه"وهو بكون زي الكسره رهيفه ولكنو اتقل وانشف شويه.

حسن محمد
11-04-2011, 04:26 PM
اخواني اسألكم في واحد منكم قعد مع الوالده جنب الصاجن وإستناها لمن عاست "اللُقمه" وأدتو "الشيط"والشيط ده باقي العجين البكون ماسك في الصاجن بعد ما الوالده تتطلع "اللُقمه"وهو بكون زي الكسره رهيفه ولكنو اتقل وانشف شويه.

ومنها جاء اسم الشيطة المعروفة بالجريف غرب

سلوى حسن جمبو
11-04-2011, 04:36 PM
الفرق بين العمبلوب والعتوت شنو؟
قصدك العمبلوك لأن العمبلوب : هو جلد العجل الميت يقوم الناس بحشوه لغرض حلب البقرة حيث أن البقر لايقف للحليب بدون حوي (ربط) جناها قربها . والعمبلوب هو خيال المآته
والله أعلم ننتظر الأخ حسن للتصحيح

هاشم عبد الكريم
12-04-2011, 02:12 AM
ماهو الشرقرق و ما هى قنطرة الفضة ؟؟؟؟

إنا من الصفيح تصنع فيه القهوه قبل صبها فى الجبنة ،
القنطرة هنا كما اوضح الاخ حسن هى القطعة النصف دائريه تكون فى مؤخرة السكين عند نهاية المقبض الخشبى ،وشكلها الدائرى فى نهاية السكين يقى الزراع من الخدش -لان السكين كانت قديما تلبس فى الزراع اليسرى بعد إدخالها فى بيت مصنوع من الجلد ، وتكون القنطره عادة من الفضة لقوة تحملها .

حسن محمد
12-04-2011, 09:26 AM
والله ياهاشم وسلوي انا ذاتو بقيت داير لي مترجم الله يديكم العافية

حسن محمد
12-04-2011, 09:27 AM
قصدك العمبلوك لأن العمبلوب : هو جلد العجل الميت يقوم الناس بحشوه لغرض حلب البقرة حيث أن البقر لايقف للحليب بدون حوي (ربط) جناها قربها . والعمبلوب هو خيال المآته
والله أعلم ننتظر الأخ حسن للتصحيح
نرجع للاخ التيت لعل الاجابة معه

عبدالله التيت
12-04-2011, 09:54 AM
نرجع للاخ التيت لعل الاجابة معه
كنت عارف فى فرق بين العمبلوب والعمبلوك بس كنت عاوز اعرف الفرق بينهم
والاخت سلوى ماقصرت شخصت الاجابة.

حسن محمد
12-04-2011, 11:14 AM
كنت عارف فى فرق بين العمبلوب والعمبلوك بس كنت عاوز اعرف الفرق بينهم
والاخت سلوى ماقصرت شخصت الاجابة.

تيت تيت تيت تيت تيييييييييييييت
مبروك طلعت قدييييييييم كنت قايلك موديل 29ههههههه

حسن محمد
12-04-2011, 11:17 AM
قصدك العمبلوك لأن العمبلوب : هو جلد العجل الميت يقوم الناس بحشوه لغرض حلب البقرة حيث أن البقر لايقف للحليب بدون حوي (ربط) جناها قربها . والعمبلوب هو خيال المآته
والله أعلم ننتظر الأخ حسن للتصحيح
معقول البقرديل حيوانات للدرجة دي

عبدالله التيت
12-04-2011, 01:55 PM
مبروك طلعت قدييييييييم كنت قايلك موديل 29ههههههه
بس ماتكبرنا للدرجة دى!

عائشة الفاتح
13-04-2011, 12:52 PM
بس ما تضحكوا علي كنت مفتكرة القطيع يعني قطيع الحيوانات:dai5:
غايتو انا وعشوش دي اول المسجلين في الكورس ده
اها الرسوم كم ؟
أحرجتينا معقول ما بتعرفي القطيع ؟:spor:
أنا زاتي إتخيلتوا قطيع حيوانات . ؟:6ma6:

عائشة الفاتح
13-04-2011, 01:01 PM
أم دقوقه وما أدراك ما أم دقوقه !!
نتمنى من الدكتورة عائشة والدكتورة تماضر يُحدثونا عن أم دقوقه وياريت كمان ويلقوا لينا الضوء عن أخر ما توصل له العلم بخصوص هذا المصل الهام !!!:ANSmile09:

كويس يا ود الحبر , بجي يوم و بتسدى فيك :spor:

تماضر
13-04-2011, 02:14 PM
شكرا للاصدقاء والجمهور على المساعدة

هاشم عبد الكريم
14-04-2011, 01:06 AM
[COLOR=royalblue](نسال الاخ هاشم كان بدودر كيف)
ويقال دودرت فلان في الكلام اي اتي به لما يريد
من الاصدقاء الاعزاء وزملاء قبيض الطير فى الطفولة ، صديقى كمال الزبير عبد الله عباس(جلال الزبير)له التحايا والاشواق عبرالاعضاء و المتاوقين الاكارم ، وأكتر دوديرنا كان (بأم قيردون الحاجة)وفى سنار تسمى القينقرد وهى نوع من الطير الحلوة الطعم وبحجم اكبر من (ودابرق /الترتار واللبوتة المكاره )والإعتقاد السائد زمان كان أن ام قيردون تذهب للحج فى الموسم لعدم وجودها ايام الحج والظريف من القصص يقال انها تصادق طير الرهو وتستأجره للركوب على ظهره لمشوار الحج وبهذا جاءت التسمية بام قيردون الحاجة .وكان الإعتقاد بانها عندما تسمع الدودير ولصِدقها لانها جاءت من الحج تتوجه بسرعة ناحية الشرك ومع ثقافتها وروعتها فهى تحب الديدان وصغير الجراد يعنى قبل ما تشرك لازم تجهز الجراد والديدان(الجهل مُصيبتين):
ام قيردون يالحاجه
بت المليك يالحاجه
دودك ورد يالحاجه
بحرك شرد يالحاجه
ولدك عريس يالحاجه
يوم الخميس يالحاجه
جاب ليك قميص يالحاجه

هاشم عبد الكريم
14-04-2011, 01:42 AM
الكُشر مفردة من (الرطانة) النوبيّة القحة وهي تعني المفتاح علماً بأن ليس كل مفتاحٍ كُشر...
فعلا اخى ياسر فالكُشر هو مفتاح الطبال والذى وفق الله تعالى النجارين القدامى فى الابداع بصنعه من أبسط قطع الخشب ،

هاشم عبد الكريم
14-04-2011, 01:58 AM
]
انا تعبانه لكن ما لدرجة البنبر بعرفو شديد (قلت احسن صورتي شوية

الاخت الدكتورة تماضر،تحية معها لم نقصد ذلك،ولقد قمت بالشرح عامة لقناعتى بأن هنالك من لا يعرف البنبر ، فهنالك ما يُسمى :القَعاد وهو مقعد يُنجر من الخشب ويُملس تجلس فيه النساء (وخاصة العجائز) وهو غير البنبر(المنبر) ،ومع جلسة هادئة فى دانقة حسن كلونيا العيلفونية .

مالك النور
14-04-2011, 04:56 AM
اخواني طبعا اللعبه دي حقة الاولاد زمان البنات بره,لعبتوا "شليل وينو اكلو الدودو ,شليل وين راح اكلو التمساح كنا بنلعبها زمان في الخور في رمضان بعد شراب المويات وهي من اللعبات السودانيه القديمه وكانت بسيطه جداً يحمل احدهم حجر أو عضُم "شليل"ويجعو بعيد ويبدأ الجماعه في البحث عن شليل وبعد بحث شديد يعثر أحدهم علي شليل وتكون مُكأفأته بأن يسُك الجماعه ومن يقبضو يحمله علي ظهره.

حسن محمد
14-04-2011, 10:01 AM
[color=navy]
من الاصدقاء الاعزاء وزملاء قبيض الطير فى الطفولة ، صديقى كمال الزبير عبد الله عباس(جلال الزبير)له التحايا والاشواق عبرالاعضاء و المتاوقين الاكارم ، وأكتر دوديرنا كان (بأم قيردون الحاجة)وفى سنار تسمى القينقرد وهى نوع من الطير الحلوة الطعم وبحجم اكبر من (ودابرق /الترتار واللبوتة المكاره )والإعتقاد السائد زمان كان أن ام قيردون تذهب للحج فى الموسم لعدم وجودها ايام الحج والظريف من القصص يقال انها تصادق طير الرهو وتستأجره للركوب على ظهره لمشوار الحج وبهذا جاءت التسمية بام قيردون الحاجة .وكان الإعتقاد بانها عندما تسمع الدودير ولصِدقها لانها جاءت من الحج تتوجه بسرعة ناحية الشرك ومع ثقافتها وروعتها فهى تحب الديدان وصغير الجراد يعنى قبل ما تشرك لازم تجهز الجراد والديدان(الجهل مُصيبتين):
ام قيردون يالحاجه
بت المليك يالحاجه
دودك ورد يالحاجه
بحرك شرد يالحاجه
ولدك عريس يالحاجه
يوم الخميس يالحاجه
جاب ليك قميص يالحاجه

هل كنتم تضربون علي صدوركم ضربا خفيفا باليد المقبوضة حتي تخرج الانغام وفيها ازيز لطيف

اتمني ان نسمع ناس (اريكا عمياء)
نسال عن معاني بعض الكلمات في الالعاب الشعبية مثل الليم والجك بضم الكاف والجيم واريكا سالفة الذكر
وهذا سوف ياتي دوره في قسم الالعاب الشعبية التي اقترح علي الاخت سلوي وهاشم ان يفتحوا لها بوستا خاصا

عبدالله التيت
14-04-2011, 02:36 PM
البُرمة : بضم الباء هو الزير الذى نشرب منه الماء وهو مصنوع من الفخار

عبدالله التيت
14-04-2011, 02:37 PM
الحنفية: ماسورة المويه

صديق حسن الأمين
16-04-2011, 01:01 AM
(الكلونيا بعد المَّسخ الأرياح)

(المقصود :تغير اسم كلونيا من صاحبه الى اسم اجمل :المسخ الارياح فرير دمور )

ما دام دخلتونا الزريبة كدي دحين جيبوا لي (البعامية) دي عشان( نصررا) (والكرتة) دي لبسوها (الخرتاية) والسخيل ننجرلو (خلال)

استبعد تماما ان الاخ عبد التيت ما يكون سمع بقولة عنترة بن شداد :العبد لايجيد الكر والفر بل يجيد الحلب والصر ،وشاف التقره بت البعاميه وحداها الغنمايه الكرته ويكون قد صنع عدد من الاعواد الخفيفة وعملها لِجام للسخيلات والعتنان الصغار لكى لا يرضعن امهم الا بعد فك اللجام بالاضافة لربط القماش المُخيًّط فى شكل مربع على الغنمايه الوالده .ويكون محظوظ لو اشترى غنمايه غارزة، بعد ما علق للحمارالمكادى ونقرط ليهو فى الطريق للمشى بسرعة .وركَّب عليه الخُرج وشَّد اللِبده اول فوق ليها السرج وفوقه البردعه وكربهم قوى باللباب والضناب وهو وارد من البحر.

عبدالعظيم الفكى
20-04-2011, 05:23 PM
(على نسق محمد عثمان)
ممنوع لأكثر من 30 سنه- وممنوع سؤال الحبوبات.

الإمتحان:

كركب
كلب
وناسه
سوكره
طاقه
شعبه
مقموله

احمد الحبر
20-04-2011, 05:42 PM
دا امتحان بالأردو يا عظمه ولا شنو ؟!!

حسن محمد
20-04-2011, 05:54 PM
(على نسق محمد عثمان)
ممنوع لأكثر من 30 سنه- وممنوع سؤال الحبوبات.

الإمتحان:

كركب
كلب
وناسه
سوكره
طاقه
شعبه
مقموله

هناك بوست مثبت في هذا المنتدي بهذا الخصوص وقد وردت فيه ثلاثة او اربعة من الكلمات السابقة
الاخ عبد العظيم نتوقع مشاركاتك في ذلك البوست وانت تحمل هذا الارث

واحد من الناس
20-04-2011, 06:04 PM
دا امتحان بالأردو يا عظمه ولا شنو ؟!!

والله شكلو كده لو انت بتعرف اللغة دي

عبدالعظيم الفكى
20-04-2011, 07:24 PM
الأعزاء ود الحبر- حسن محمد-واحد من الناس
معليش ما قايلكم من المنشيه..... ياشباب دا إرث عيلفونى قديم ما بتقروا تاريخ ولا شنو.

umabdulrahman
20-04-2011, 07:41 PM
كركب=مفتاح من الخشب يفتح به أبواب الخشب القديمه وضخمه، والمعني الثاني شبشب من الخشب
كلب= جزء من كالون باب الخشب
وناسه=؟؟
سوكره= (زريبه الغنم -حراصه للغنم الخارجه عن القانون!!)
طاقه= شباك صغير . أو بكرة القماش
شعبه= العمود الذي يحمل سقف البيت
مقموله= بليله العدسي(مقطوع أخضر وطازج)
"لسه بدري علينا من ال-30 سنه بدليل أني فشلت في "وناسه"

حسن محمد
21-04-2011, 06:55 AM
كركب=مفتاح من الخشب يفتح به أبواب الخشب القديمه وضخمه، والمعني الثاني شبشب من الخشب
كلب= جزء من كالون باب الخشب
وناسه=؟؟
سوكره= (زريبه الغنم -حراصه للغنم الخارجه عن القانون!!)
طاقه= شباك صغير . أو بكرة القماش
شعبه= العمود الذي يحمل سقف البيت
مقموله= بليله العدسي(مقطوع أخضر وطازج)
"لسه بدري علينا من ال-30 سنه بدليل أني فشلت في "وناسه"

كان (علبت) (الوناسة)(وتاوقت)في(نفاج)(البوست)(الليلنا)كان عرفتنا
لك الود اكرر دعوتك للبوست الخاص بهذا الموضوع

الوان
21-04-2011, 07:17 AM
السوكره للغنم الهاملات ساى والطاقه الناس بكونو كلهم عارفنها زى الشباك وبتكون غالباً فاصله بين جارين الشعبه بتستعمل كدعامه للرواكيب وبتكون دايماً فى النص اما المقموله العدسى او البليله قبلى ماتنجض على شجرتا وبتأخز نار مع المويه+ ملح يعنى بتكون (مسلوقه) والله اعلم

ياسر عبدالرحمن خيري
21-04-2011, 07:58 AM
نرجو ضم هذا البوست لمَثِيله المُثَبّت بالمنتدى العام من قبل الإدارة فالفكرة واحِدة!

حسن محمد
21-04-2011, 10:26 AM
اما( البعامية )فهي الغنماية الماعندها قرون و(الكرتة)الماعندها اضنين او اضنينها صغار وتاخذ شكلا منتصبا وغير متدلي كما في الاغنام والباقي نخلي للبياطرة

عبدالله التيت
21-04-2011, 11:30 AM
اما( البعامية )فهي الغنماية الماعندها قرون و(الكرتة)الماعندها اضنين او اضنينها صغار وتاخذ شكلا منتصبا وغير متدلي كما في الاغنام والباقي نخلي للبياطرة
التقرة ماذكرتها

حسن محمد
21-04-2011, 11:32 AM
التقرة ماذكرتها
اللهم اغفر الى اهلنا وعافيهم
واكرم نزلهم
ووسع مدخلهم
واغسلهم بالماء والثلج والبرد
ونقهم من الذنوب والخطايا كما ينقى
الثوب الأبيض من الدنس
اللهم جازهم بالحسنات إحسانا..
وبالسيئات عفواً وغفرانا..
اللهم أنزل على قبرهم الضياء والنوروالفسحة والفرح والسرور
واجمعنا بهم في الفردوس الأعلى من الجنة .. برحمتك يا أرحم الراحمي
قلنا الباقي نخلي للبياطرة

احمد الحبر
21-04-2011, 12:10 PM
نرجو ضم هذا البوست لمَثِيله المُثَبّت بالمنتدى العام من قبل الإدارة فالفكرة واحِدة!

تم الدمج ..

عبدالعظيم الفكى
21-04-2011, 02:32 PM
مشكور أحمد الحبر يا إداره . أها بعد دا النفتح ( السحاره) ونمرق المدسى -والسحاره لعلم الما عارف صندوق خشبى كبير زمان كان بيستعمل كدولاب ملابس وبختوا فيهو بعض الأشياء النفيسه. وبالمناسبه دى أذكر وأنا صغير وكنا فى قريه مع الوالد _ كان الله يرحمو مساعد طبى تلك القريه - وكانت منازل تلك القريه قطاطى من القش وان من المعتاد فى الخريف أن تشتعل النار فى تلك القطاطى وأذكر انه أشتعلت النار فى إحدى تلك القطاطى وصرخت النسوه السحاره السحاره أمرقو السحاره ولم أحضر باقى الحكايه لأننى وليت الأدبار ظنا منى بانها ( بعاتى)

Dr.Mutasim I. Abdalnoor
21-04-2011, 03:08 PM
هل كنتم تضربون علي صدوركم ضربا خفيفا باليد المقبوضة حتي تخرج الانغام وفيها ازيز لطيف

اتمني ان نسمع ناس (اريكا عمياء)
نسال عن معاني بعض الكلمات في الالعاب الشعبية مثل الليم والجك بضم الكاف والجيم واريكا سالفة الذكر
وهذا سوف ياتي دوره في قسم الالعاب الشعبية التي اقترح علي الاخت سلوي وهاشم ان يفتحوا لها بوستا خاصا
الظاهر عليك كنت حريف في البلي
الليم: هو اللين وهو المثلث الذي يوضع فيه البلي وأفتكر انها مشتقة من الكلمة الانجليزيةline
الجك:يعني في النص
اريكا وعمية : ده لعب بنات ما بعرفو
بتعرف الداندلك والضراب وحرينة وسكج بكج وحلو وردها بانجلو وواحد اللى؟والرمة والحراس وام الصلص وكمبلت؟ وشليل وينو ختفو الدودو؟
طيب بتعرف سكج بكج بلعبوها بي كم ضقل ووظيفة كل منهم؟

حسن محمد
21-04-2011, 03:12 PM
التقرة ماذكرتها

الظاهر عليك كنت حريف في البلي
الليم: هو اللين وهو المثلث الذي يوضع فيه البلي وأفتكر انها مشتقة من الكلمة الانجليزيةline
الجك:يعني في النص
اريكا وعمية : ده لعب بنات ما بعرفو
بتعرف الداندلك والضراب وحرينة وسكج بكج وحلو وردها بانجلو وواحد اللى؟والرمة والحراس وام الصلص وكمبلت؟ وشليل وينو ختفو الدودو؟
طيب بتعرف سكج بكج بلعبوها بي كم ضقل ووظيفة كل منهم؟
هل تعلم ان الكركيت هو الجيل التالت من الضقل <<<جااااااااااااااااااااااااك

Dr.Mutasim I. Abdalnoor
22-04-2011, 12:10 AM
يادكتور معتصم حسن كلونيا دقا التيوة معاكم في حوش باشري
والا ضقيلوا دا في صفحات المنتدي ساي زينا نحنا كده!!!
نحنا غايتو كرة الشراب دي لعبنا بيها (كمبلت ) بي علب الصلصة وحصلنا كمان الضقل .
لكن اجمل العابنا كانت بي الضراب الكبير نخرت ابو اربعة وردات ونخاف من الجلة عشان ما تدشدشو ولو طقشتو بتشرم خاصة لو دقو نظر لانو لو بقا مشرم ما عندو قيمة . واجل حاجة انك تتباهي بيهو لما تخرتو من اصحابك.

.



اها يا ابو علي لقيتني كييييييييييييف!!!
هههههه. والله بي طريقتو واسلوبو ده بكون لعب معانا، وما بعيد نكون ردمناهو ليك ردم شديد بي كمية من الاجواز(جمع جوز)،والبلنجات.
اطرف ما في ردك قصة (دق النظر)هههاي شفت الواحد بيغمض عين ويفتح التانية كانو وليم تل ويخت الضراب في نخرتو ويكون منشن علي البلية بعد ان يفصلها عن بقية البلي بجزء من قدمه.
أذكر ان ابن خالتنا عبد المنعم كان نياش نيش شديد ومن ما مسافات بعيدة جدا، ولو لعبت مهاهو بي شرف وامانة بخرتك بليك كلو. لكن اخوك كان (ملك الخرخرة) ودائما ما كنت اكش اللين بجزء من الضراب والجزء الاخر بيدي ومعاها مطة كمان.:d

صديق حسن الأمين
22-04-2011, 12:13 AM
انت فاضي من (التيوة) قاعد (تضقل) ساي مع ناس سكوها وكردوها وجروا وراها عرفتها شنو (الجلدة) اها ليقيتنا كيف(جكسا) عديييل كدة مع انو خليناها من زمن (الشراب)
التيوه : نواة الدوم يعنى تكسر الدومة بعدما تُكدها تمام (قرعة)وتلعب بيها كورة وما تضربها الا بعصايه غلييييييده لانها حاره على الاقدام .وتلعب بكرة الجلد،وجكسا رمز للاعب الممتاز ،كرة الشراب مجموعة من الاقمشة القديمة وتدور فى شكل دائرى داخل شراب وتخيط بالخيط لتكون كرة لعب قبل ظهور كرة البلاستيك والكرات الحديثة,

صديق حسن الأمين
22-04-2011, 12:24 AM
غايتو بتداقش معانا لوكنت حاضر التلفون الكان في دكان ابوك.
موضوع الالعاب الشعبية موضوع مهم جدا وسوف نفرد له جانبا في هذا البوست
الاخت سلوي دخلت (الزريبة) وما مرقت لسع اظنها خشت قفص (الجداد) باقي ضاربو (هيم) والليلة ماسامع ليهو صوت اوعي يكون ضربوا (سمير) غايتو انتظر شوية خليها تلقط (جني جداد) (خلينا نتريق)
هيم مرض الدجاج وسمير مرض دجاج اخطر من الهيم ،جنى الجداد البيض (المِح)نتريق :نفطر (الريوق) نفك الريق يعنى نتناول وجبة الفطور الصباحية (بس ما شندوتش شاورما ،( لقمة بتقلية )

صديق حسن الأمين
22-04-2011, 12:30 AM
ماهو الفرق بين( التتفن )و (الصنقير)
التتفِن : الجلوس على الارض مباشرة بكل تقل الرجلين والارداف ،
الصنقير :الجلوس على الامشاط ،الاقدام (ام قللو) وممكن يكون الصنقير ايضا على بمبر او اريكة او كرسى او حجر او حيطة صغيرة .او فى ضُل البرنده .

صديق حسن الأمين
22-04-2011, 12:40 AM
إتَفّنى ليته سهلها ليك وقال : إتفنى فى الدَغما
،ويقول له دى هجيرة صيد ام قيردون ؟؟
.
الدغما : الارض
هجيرة : وقت شمس حارة مع (سموم )
ام قيردون : اسم لواحدة من الطيور

Dr.Mutasim I. Abdalnoor
22-04-2011, 10:20 AM
يا صديق متفسح فينا لكن كان مشيت السودان بدقسوك بي لغة الراندوق(العامية السودانية الجديدة البغيضة) من نوع القطع الناشف،الشمار،ومشيت اعمل محمود الخطيب عملو لي عقد الجلاد،الفردة،الحنان،ودي عايزة ليه بوست مخصوص

حسن محمد
23-04-2011, 10:11 AM
يا صديق متفسح فينا لكن كان مشيت السودان بدقسوك بي لغة الراندوق(العامية السودانية الجديدة البغيضة) من نوع القطع الناشف،الشمار،ومشيت اعمل محمود الخطيب عملو لي عقد الجلاد،الفردة،الحنان،ودي عايزة ليه بوست مخصوص
صدقني كنت بصدد عمل بوست بهذا الخصوص (الرندووك) وبما انك اصغر سنا منا ومواكب فيا ريت نشوف هذا البوست

حسن محمد
23-04-2011, 10:15 AM
التتفِن : الجلوس على الارض مباشرة بكل تقل الرجلين والارداف ،
الصنقير :الجلوس على الامشاط ،الاقدام (ام قللو) وممكن يكون الصنقير ايضا على بمبر او اريكة او كرسى او حجر او حيطة صغيرة .او فى ضُل البرنده .
كلاهما يعني الجلوس ولكن لاحظت ان التتفن يرتبط بالمتعة والصنقير يرتبط بالملل
هي ملاحظة وليس لدي مرجعية لذلك

حسن محمد
25-04-2011, 12:08 PM
القصيدة منقولة بالنص الذي شارك عبد الله محمد عبد الدائم اليوم في مكان اخر
ولارتباط بعض الجمل والكلمات الواردة فيها بهذا البوست
نرجو من المتداخلين استخراج هذه الجمل والكلمات ؟ حتي يتمكن اخرون من الاجابة عليها

عم عبد الرحيم
محمد الحسن سالم حميد


فتاح يا عليم .. رزاق يا كريم ..
صلى على عجل ..
همهم .. همهمات ..
حصن للعباد ... وهوزز سبحتو ..
ودنقر للتراب .. هم فوق هم همات ..
صنقع للمسا ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ؟..
لا لمسة حنان .. لا لمسة وداد ..
لا رمشة طريق من قلباً وفي ..
زي أيام زمان ..
أيام الدفي ..
**************
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..
**********************************
عم عبد الرحيم أتوكل نزل ..
في المشرع لقى .. زملان الشقى
الجأ من الجريف .. الجأ من الجبل
عله الناس بخير .. صبح هاظرم
نقنق ناقرم .. غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..
****************
الطاق اليطق عشت أبو الزمل ..
بالحالة العليك بالفال بالأمل ..
عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار آبدوم ...
******************************
وعم عبد الرحيم ماشي على الشغل ..
في البال القديم إتعارض تُكل ..
تنشايح جراح يا ..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القصد القديم .. وبيناتن عشم ..
في الفرج البعيد ..
****************
أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن آبفيد .. طقن آبزيد ..
وإنطقن زمن ..
وإنطق الزمن لازم توب جديد ..
وبأية تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..
*********************
عم عبد الرحيم يا حر ..
ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما تمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..
******************
والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سعلتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشه دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..
*****************
وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هانقدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكد في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..
*******************
حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السقتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. ونقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجأ وما وصل ..
زي الحال ده يوم لا كان لا حصل .. والبال إشتغل
****************
السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..
**************************
فتاح يا عليم .. سال الدم مطر ..
جرتق بالتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة الحمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر ..

Dr.Mutasim I. Abdalnoor
25-04-2011, 01:49 PM
قصيدة رائعة موغلة في العامية المحببة واداء رائع للرائع مصطفى سيد أحمد رحمه الله.
همهم
هوزز
دنقر
صنقر
ايام الدفي
المراح
نضم
الجريف
هاظرم
قربم
الطاق اليطق
كُت
آبدوم
نتشايح
النعال والطرقي
النقلتي
طقهن آبفيد آبزيدصفاح
شلبيت غريق
طوح نقر
كلات المواني
يلكُد
باختصار كده معظم القصيدة وانا عارف معاني كل الكلمات السابقة ونشوف باقي الشباب

هاشم عبد الكريم
27-04-2011, 08:58 PM
الخرزه
والحريره
والضريره
وتجرتقو
قطعنا تزكرة عودة للكشف عن المتبقى من زبائن الترماج الذين وفدوا للمحطة متأخرين،بالغلط وصوا الاسكلا ضهبانين،الكمسارى قال مافى نازل هنا )
نمشي علي (المدماق)و(الكنيزير)و(الملطم)و(العرموس )
لنتصلبت فى الشرح مادام اخونا المهندسين والفنيين لم يحضروا (والمعزرة كان خِتينا):
المُدماق او المُدماك :صف أفقى من الطوب اخضر او احمر او طابوق ،محصور بين طبقتين من المونه(خلطة التراب او الاسمنت والرمل بالماء)ويكون سُمك المدماك بسمك الطوبة او الطابوقة .مدماك القد هو المدماك الذى يحدد موقع الحائط بالمبنى.
الكنيزر:ربع خالى بعرض الحائط لايجاد مساحة الطية بين المدماكين وهى المسافة الافقيه بين كل راسيين فى مدماكين متتالين وتساوى تقريبا ربع طوبه .
الملطم:كوم التراب المخلوط بالماء وخلطه بالطوريه او الكوريك ليتحول الى طين (مونه)وكذلك الرمل او الحصى مع الاسمنت بالماء فى حالة المونه الحره.
العرموس :هو المدماك الذى يحدد موقع الحائط بالمبنى

هاشم عبد الكريم
27-04-2011, 09:13 PM
اها يا هاشم اخوي لقيتني كييييييييييف !!!!
لقيتك كابتن تراث مخضرم عديييييييل كدا وأكل الصالونه والكبسه والهريس ما نسوك القيروانه و التُمنه والتيلة والمُترار والكركب والترتوس الانعدم فى السوق بالمره .

هاشم عبد الكريم
27-04-2011, 09:50 PM
غنمايه غارزة، بعد ما علق للحمارالمكادى ونقرط ليهو فى الطريق للمشى بسرعة .وركَّب عليه الخُرج وشَّد اللِبده اول فوق ليها السرج وفوقه البردعه وكربهم قوى باللباب والضناب وهو وارد من البحر.
غارزة : فى اشهرها الاولى من الحمل.
علق : جهز البرسيم او القش او القصب
المكادى : الذى لا يتحرك عند الامر بالحركة ويعاند يعنى مكار وعنيد للغاية.
نقرط : هى لفظة او نغمة عجيبه تخرج بحركة اللسان مع جانب واحد من الاضراس مع فتحة تهوية بسيطة من الفم ولا توجد حروف عربيه لكتابتها وعندما تُكرر لعدة مرات لصاحب انكر الاصوات تعقبها الكلمة السودانية البحته (عَّرد وتنطق بسرعة وبصوت عالى وبتكرار) فيتحرك بسرعه وينفذ التعليمات ،
الخُرج:حقيبه عريضة من الجلد او القماش القوى تتكون من قطعتين متشابهتين لحمل الاغراض بطريقه متوازنه على الدابة ،والخُرج المصنوع من الجلد وله فتحة صغيرة فى اعلى اركانه يستعمل لحمل الماء .
اللِبده:مسند او مخدة قماش محشوه بالصوف توضع تحت السرج لحماية جلد الدابة من احتكاك السرج الخشبى الحار.البردعة مخدة من قماش محشوه قطن توضع فوق السرج ،
اللباب هو الحزام الجلدى او البلاستيكى لربط السرج على ظهر الدابة ،والضناب هو الحبل الذى يربط السرج مع ذيل الدابة للحفاظ على سلاسة الحركة عند السرعة .
وارد من البحر :عائد من البحر .

هاشم عبد الكريم
28-04-2011, 01:36 AM
كلاهما يعني الجلوس ولكن لاحظت ان التتفن يرتبط بالمتعة والصنقير يرتبط بالملل
هي ملاحظة وليس لدي مرجعية لذلك
اوافقك فى المرجعية بالتجربه والملاحظة والمعنى البعيد

سلوى حسن جمبو
28-04-2011, 04:21 PM
الخرزه
والحريره
والضريره
وتجرتقو
اول شئ نعرفكم بمكونا ت الجرتق
1/ عنقريب :
وهو معروف للكل ( سرير من الخشب منسوج بألياف نباتية)( الحبل)
2/ البرش :
وهو مفرش يصنع من سعف النخل ويكون ملون بعدة الوان وله عدة استعمالات
3/ الصينية :
وتكون بها رموزوأدوات يغلب عليها اللون الاحمروبطريقة مميزة و بداخل الصينية يوجد
1/ المبخرومصنوع من الفخار وملون
ويكون البخور المستعمل التيمان المسبع للحسد، والصندل لتعطير المكان
2/ صحن الباشرى:
ويكون عادة من الفخار المحروق ذو اللون الازرق او الاحمر او اقرب للبنى الفاتح وهو الذى تعجن فيه الحناء
3/ الحق:
ويكون اكثر من واحد وهو الاعجاز السودانى الخالص فهو مصنوع من خشب ليست لهو مسام مما يحفظ العطور المصنعة محليا لاطول فترة ممكنة كما توضع فيه كل انواع البخور
ب/ الضريره وهى مخلوط من المحلب وعدة عطور ومسك ويرش معها قليل من الفليردامور توضع على رأس العريس
4/ الشموع :
وتكون موضوعة فى صحن الباشري ( زى مافى التورتة يا ناس الشهادة العربية)
ملحـــــــــقات للجرتق
1/ الهلال الذهبى : يكون موضوع فى قطعة حرير احمر ويربط فى راس العريس
2/ الفقرة الاخيرة من العمود الفقرى لسمك ( القرقور)
3/ الخرزة الزرقاء وتربط فى يد العريس بخيوط من الحرير الاحمر
4/ سوط العنج
5/ السيف
6 /ثوب السرتى
الصورة توضح لنا الحريرة وعليها الخرزة وهى تربط على يد العريس
http://www.elafoon.net/board/up/download.php?img=2868

سلوى حسن جمبو
28-04-2011, 05:12 PM
http://www.elafoon.net/board/up/download.php?img=2871
صحن الباشرى
http://www.elafoon.net/board/up/download.php?img=2872
صينية الجرتق وعليها الحق من ثلاثة أحجام

توحيده لطفي احمد سعد
29-04-2011, 07:46 AM
يعني نحنا مامعاكم في السؤال ولاشنو؟ نشكرك يااخ حسن علي الموضوع الرائع الجميل عن مصلحات واسماء اشياء اندثرت مع تطور الحياة و لعدم استعمالها لنا في حياتنا اليوميه و التي لايعرفها الجيل الجديد وابناءالمغتربين...كما نشكر الاخت العزيزه سلوى والاخوه والاخوات على توضيح الكثير من المصطلحات ومسميات الاشياء التي كنا نجهل بعضها برغم كبر سننا مثل اللدايه الكنتوش والكتوش .ومشكورين ونحن في انتظار المزيد...

سلوى حسن جمبو
29-04-2011, 02:35 PM
يعني نحنا مامعاكم في السؤال ولاشنو؟ نشكرك يااخ حسن علي الموضوع الرائع الجميل عن مصلحات واسماء اشياء اندثرت مع تطور الحياة و لعدم استعمالها لنا في حياتنا اليوميه و التي لايعرفها الجيل الجديد وابناءالمغتربين...كما نشكر الاخت العزيزه سلوى والاخوه والاخوات على توضيح الكثير من المصطلحات ومسميات الاشياء التي كنا نجهل بعضها برغم كبر سننا مثل اللدايه الكنتوش والكتوش .ومشكورين ونحن في انتظار المزيد...
الأخت توحيدة سرنا مرورك العطر عبر بوابة المصطلحات والمسميات التراثية التى نقوم بترجمتها وبوابتنا مفتوحة للجميع للمشاركة ويسعدنا تواجدك معنا وليتك تاتينا باى شئ منك مخبأ بالسحارة او حتى وجبة مطبوخة على الكنتوش ولا شوية روب من السعن
وطبعا اولادنا كلهم مسطحين وخاصة فى الغربة ماعندهم اى ثقافة سودانية والمشكلة هم بجبرونا نتعامل معهم بلغتهم وما بدونا فرصة لنعرفهم بتراثنا
الله يكون فى عونهم

توحيده لطفي احمد سعد
29-04-2011, 04:20 PM
في الحصة عقلي أنا تاه سدر
يمة المدرس لو فكر
كان يلقا جنبك فوق ككر
في الدونكا لسع ما فطر...... اشكرك ياأخت سلوى على الترحيب وأهديكم هذه الأبيات عن الككر ، تعريف الككر : هو مقعد قصير مصنوع من الخشب كان يجلس عليه الصغار والكبار خاصة في التكل عند العواسة وغسيل الملابس في الطشت، والككر كان يجلس عليه سلاطين الفونج عند التتويج بالملك.

صديق حسن الأمين
29-04-2011, 10:31 PM
يا صديق متفسح فينا لكن كان مشيت السودان بدقسوك بي لغة الراندوق(العامية السودانية الجديدة البغيضة) من نوع القطع الناشف،الشمار،ومشيت اعمل محمود الخطيب عملو لي عقد الجلاد،الفردة،الحنان،ودي عايزة ليه بوست مخصوص
ألكع أفتحو بِسراع قبال ما نبقالو طُرُش فى الزفة !!!

صديق حسن الأمين
29-04-2011, 10:52 PM
قطعنا تزكرة عودة للكشف عن المتبقى من زبائن الترماج الذين وفدوا للمحطة متأخرين،بالغلط وصوا الاسكلا ضهبانين،الكمسارى قال مافى نازل هنا )
لنتصلبت فى الشرح مادام اخونا المهندسين والفنيين لم يحضروا (والمعزرة كان خِتينا):

العرموس :هو المدماك الذى يحدد موقع الحائط بالمبنى

(الله يكفينا شر الصلبته والدخول بين القشرة والثمرة) الترماج :قطار قديم وافتكر هو التُرام ،قطار داخلى بالعاصمة .
الاسكلا : الميناء (من الأسكلا وحلا )
الكمُسارى ماديرة شرح غير ان الصفارة والطربوش ترتبط به ،
شيتكم ده خباروا موتام ، لا فيهو مسطريمة لا قِده لا طالوش لا بربيت لا ترويسه لا حمار لا سقاله لا عفريته مالو؟ ويوميتو قُوال وله مقطوعيه ؟؟

صديق حسن الأمين
30-04-2011, 08:42 PM
لقيتك كابتن تراث مخضرم عديييييييل كدا وأكل الصالونه والكبسه والهريس ما نسوك القيروانه و التُمنه والتيلة والمُترار والكركب والترتوس الانعدم فى السوق بالمره .
(الكاشف اخوى -الناس ما تخليهم يستوعبوا الفات)
القيروانه : الصفيحة الفاضيه
التُمنة :الإناء الحديدى(او الالمنيوم)رمادى اللون على شكل الزجاجة الكبيره اسطوانى الشكل برأس ضيق يوضع فيه اللبن للبيع ويُركب على الحمار على الجهتين لحفظ التوازن ،والتمنة ايضا هى وزنة عند البياعين لبيع الحليب .
التيله :خاصة بالقطن طويل وقصير وتُقال لفتلة الخيط المغزول من القطن على شكل قرطاس او مخروط دائرى .
المترار: (النشوف حاجة سلوى كان داسالا مترار من حبوباتها) هو العود الحشبى فى راسه دائره قبل النهايه 4 بوصة تقريباً يتم تدوير القطن لصناعة خيوط منه وارساله لصناع (الفردة )والشالات الكُبار.
اما الترتوس (عييك ده نكتومن وين )وفعلا ده هو المعدوم هذه الايام :وهو نوع من الفحم القوى ذو شرارة عند البداية وتدوم النار بالجمرة لفترة طويلة جدا خلاف الفحم العادى وشكله ملتوى كغصن الشجر وبه فتحات صغيرة وكثيرة .

سلوى حسن جمبو
30-04-2011, 09:36 PM
التُمنة :الإناء الحديدى(او الالمنيوم)رمادى اللون على شكل الزجاجة الكبيره اسطوانى الشكل برأس ضيق يوضع فيه اللبن للبيع ويُركب على الحمار على الجهتين لحفظ التوازن ،والتمنة ايضا هى وزنة عند البياعين لبيع الحليب .

.


كلامك صحيح ومع التطور الحاصل بقى توزيع اللبن{الحليب} يتم بعدة طرق وشوفوا الدليل بالصور

http://www.elafoon.net/board/up/download.php?img=2907 http://www.elafoon.net/board/up/download.php?img=2908

http://www.elafoon.net/board/up/download.php?img=2909 http://www.elafoon.net/board/up/download.php?img=2910
وكمان بوزع فى بعض الاحيان بالبكاسى

هاشم عبد الكريم
30-04-2011, 11:31 PM
يعني نحنا مامعاكم في السؤال ولاشنو؟ نشكرك يااخ حسن علي الموضوع الرائع الجميل عن مصلحات واسماء اشياء اندثرت مع تطور الحياة و لعدم استعمالها لنا في حياتنا اليوميه و التي لايعرفها الجيل الجديد وابناءالمغتربين...كما نشكر الاخت العزيزه سلوى والاخوه والاخوات على توضيح الكثير من المصطلحات ومسميات الاشياء التي كنا نجهل بعضها برغم كبر سننا مثل اللدايه الكنتوش والكتوش .ومشكورين ونحن في انتظار المزيد...
حبابك عشرة اختنا العيلفونية توحيدة لطفى احمد سعد فى دانقة حسن للقديم والجديد ،مُرسل ليك دفار 4طن لحمل سحارتكم العتيقة للدانقة ،النسَّون هنا ضايرن التُكل وقالن (الحمد لله (الحلقة بى سندقيتها ) سلوى قالت بتصفى ليك انقارا وتقدم ليك حبة مررولان القدوقد الرسلوه ليها خِلص، وام ريان جهزت السرينا بى قدحتها،
كان ما وقع ليك ، اخونا ود خيرى حافظ الكُشر فى الكون شبر بعد ما نفضه من الفرناغة قبال ما حسن يستعجل يفلس التُكم الليل الطبال ،
وبالفعل هذه المفردات العامية فى طريقها لخزنة النسيان لعدم إستعمالها ،نطمع فى مشاركات الكثيرلتعم الفائدة .

توحيده لطفي احمد سعد
01-05-2011, 02:27 PM
الكماشه، الهبابه الهبابه تستعمل للفحم وهو في الكانون يهبو بيها الفحم لمن يصير جمر ... اما الكماشه يمسك بها الاناء وهو في النار...لكن مامتاكده صححوني لوكنت غلطانه... الدلو وهو اناء يربط به حبل وينشلو بيهو المويه من البئر .

سلوى حسن جمبو
01-05-2011, 03:32 PM
الكماشه، الهبابه الهبابه تستعمل للفحم وهو في الكانون يهبو بيها الفحم لمن يصير جمر ... اما الكماشه يمسك بها الاناء وهو في النار...لكن مامتاكده صححوني لوكنت غلطانه... الدلو وهو اناء يربط به حبل وينشلو بيهو المويه من البئر .
يديك العافية طلعتى تربية حبوبات ذينا كدة يلة نواصل دون فواصل

توحيده لطفي احمد سعد
01-05-2011, 04:50 PM
وانت حبابك مليون ياخوي هاشم عبدالكريم ،انا كنت فاكره قعادك الطويل في الامارات نساك كلام اهلنا القديم لكن تراكه لسع فاكرو ،وكلامك الاول لغاية سندقيقتها فاهمو لكن باقي الكلام مافهمتو عاوز مترجم وحااستعين بالخ ياسر خيري اوالاخت سلوى شايفاها متربيه تربية حبوبات احسن مني بي شويه ماكتير ،وبنت عمي منى ام ريان وينك فاكره نفسك يتربيتي فى العمارات ولاشنو؟ نسيتي سحارة امنا الزهراء رحمها الله والمترار وغزل الفرات ...

um rayan
01-05-2011, 11:02 PM
وانت حبابك مليون ياخوي هاشم عبدالكريم ،انا كنت فاكره قعادك الطويل في الامارات نساك كلام اهلنا القديم لكن تراكه لسع فاكرو ،وكلامك الاول لغاية سندقيقتها فاهمو لكن باقي الكلام مافهمتو عاوز مترجم وحااستعين بالخ ياسر خيري اوالاخت سلوى شايفاها متربيه تربية حبوبات احسن مني بي شويه ماكتير ،وبنت عمي منى ام ريان وينك فاكره نفسك يتربيتي فى العمارات ولاشنو؟ نسيتي سحارة امنا الزهراء رحمها الله والمترار وغزل الفرات ...
والله يا توحيدة طلعت ما شاءالله السحارة سبق تعريفها من قبل اما المترارحديدة من الالمنيوم اسطوانية الشكل ورفيعة يلف فيها القطن وتدار حتى يصبح في شكل خيوط اما غزل الفرات الفرات نوع من الثياب تصنع من غزل القطن .... اها وريني القوقاية هي شنو

توحيده لطفي احمد سعد
02-05-2011, 01:31 AM
ياام ريان طلعتي عليفونيه ميه الميه وماعندك عوجه ...اما القوقايه دي ماعرفتها اديني فرصه اسال امي رقيه الله يديها الصحه والعافيه وارد عليكي.

سلوى حسن جمبو
02-05-2011, 01:54 PM
،النسَّون هنا ضايرن التُكل وقالن (الحمد لله (الحلقة بى سندقيتها ) سلوى قالت بتصفى ليك انقارا وتقدم ليك حبة مررولان القدوقد الرسلوه ليها خِلص، وام ريان جهزت السرينا بى قدحتها،
كان ما وقع ليك ، اخونا ود خيرى حافظ الكُشر فى الكون شبر بعد ما نفضه من الفرناغة قبال ما حسن يستعجل يفلس التُكم الليل الطبال ،

الحلقة والسندقية من أجزاء الساقيه ولازم يكونوا مع بعض حتى تكتمل عملية الساقيه والجملة كناية عن وجود كل الناس ،
انقارا :الكركدى - ومعلومة بسيطة عنه زهرة حمراء تميل للبنفسج بعد التجفيف ،غنية بالفايتمين ج ،موجودة بكثرة فى السودان إلا ان اخواننا المصريين زرعوها فى مصر بكميات تجارية ،وكان اول اهتمامنا بزراعتها تجاريا عندما استوردها منا الالمان ،وسيطرت على زراعتها دول اخرى وتم تعديلها وراثيا بحيث صارت تعطى زهرة بيضاء لزوم خلطها بمشروبات اخرى وإدخالها فى صناعات اخرى وتلوينها حسب الطلب .
مررو :الفول المدمس -فول الحاجات والحجم الصغير منه .
السرينه : السرينا :العدس
الكونشبر :افتكر هى كلمة واحدة ونوبية وهى القفة الصغيرة لنقل التراب عند المزاعين يعنى اخونا ياسر لازم ينفضها من الغبار ببيتين شعر رصينين حتى تنضف و يخت فيها الكُشر
التكُم هو قفل الباب القديم (وكُرة الباب )

ياسر عبدالرحمن خيري
02-05-2011, 02:05 PM
(الشِبِرْ) كما ذكرت الأخت الفضلى سلوى ال(قُفّة) الصغيرة المصنوعة من السعف تستخدم لذات الغرض المُشار إليه ولبعض الأغراض الأُخرى ويقْرُب منها في النطق ال(شُويِر)وهو الطبق المصنوع من سعف النخيل أيضاًَ.

سلوى حسن جمبو
02-05-2011, 02:55 PM
وأتفضلوا كلكم الليلة عازماكم قدودو وام جنقر وباكمبا وأمكن الأكلات دى أكثر شئ موجودة فى الصعيد يعنى من سنار ولى غادى وفى سنار عندنا سوق اسمه ود العجوز دة فيه كل حاجة تخطر على البال ومعظم الاشياء المعروفة بغرب السودان وذلك لان سنار مستوطنة فيها عدة قبائل من كل انحاء السودان
القدقدو
يصنع من حبوب الدخن تسحن ولكن ليس ناعما يعني ( دراش) ويغلى الطحين في ماء حتى يصير طحينة ثم يشكل في شكل كرات ويترك حتى يبرد - وبعدها تخلط الكرات باللبن الرائب أو الزبادي ويضاف لها السكر
وان امكن قليل من الطحنية
وعلى فكرة بعد أكله الواحد كان لقى ليه عنقريب هبابى فى ضل الضحى بنوم للعصركأنه ادوه منوم
أم جنقر
وهي أيضا من حبوب الدخن وتطحن بنفس الكيفية ولكن تغلى باللبن الرائب أوالزبادي ( وهي مديدة الدخن )
باكمبا
وحي حبوب القمح تغلى حتى تتفتح حبات القمح ويضاف لها الكاسترد والسكر وان امكن طحنية أو بسكويت ( بالهنا )

um rayan
02-05-2011, 03:05 PM
وأتفضلوا كلكم الليلة عازماكم قدودو وام جنقر وباكمبا وأمكن الأكلات دى أكثر شئ موجودة فى الصعيد يعنى من سنار ولى غادى وفى سنار عندنا سوق اسمه ود العجوز دة فيه كل حاجة تخطر على البال ومعظم الاشياء المعروفة بغرب السودان وذلك لان سنار مستوطنة فيها عدة قبائل من كل انحاء السودان
القدقدو
يصنع من حبوب الدخن تسحن ولكن ليس ناعما يعني ( دراش) ويغلى الطحين في ماء حتى يصير طحينة ثم يشكل في شكل كرات ويترك حتى يبرد - وبعدها تخلط الكرات باللبن الرائب أو الزبادي ويضاف لها السكر
وان امكن قليل من الطحنية
وعلى فكرة بعد أكله الواحد كان لقى ليه عنقريب هبابى فى ضل الضحى بنوم للعصركأنه ادوه منوم
أم جنقر
وهي أيضا من حبوب الدخن وتطحن بنفس الكيفية ولكن تغلى باللبن الرائب أوالزبادي ( وهي مديدة الدخن )
باكمبا
وحي حبوب القمح تغلى حتى تتفتح حبات القمح ويضاف لها الكاسترد والسكر وان امكن طحنية أو بسكويت ( بالهنا )
مشكورة سلوى على تلك الاكلات الشهية وزي ما بقولو بليلة مباشر ولا ضبيحة مكاشر

سلوى حسن جمبو
02-05-2011, 03:31 PM
في الحصة عقلي أنا تاه سدر


يمة المدرس لو فكر
كان يلقا جنبك فوق ككر
في الدونكا لسع ما فطر...... اشكرك ياأخت سلوى على الترحيب وأهديكم هذه الأبيات عن الككر ، تعريف الككر : هو مقعد قصير مصنوع من الخشب كان يجلس عليه الصغار والكبار خاصة في التكل عند العواسة وغسيل الملابس في الطشت، والككر كان يجلس عليه سلاطين الفونج عند التتويج بالملك.



أشكرك أختى توحيدة على الابيات الشعرية الجميلة التى تحكى عن الكَكَر وفعلاً كان يجلس عليه السلاطين عند التتويج وهنا جيتنى لحدى عندى فنحن أحفاد السلطنة الزرقاء والفونج {سنار انا والتاريخ بدأ من هنا ومنو الماسمع بالسلطنة} والكَكَر نوعان الذى يجلس عليه الصغار او للغسيل قصير وقريب جداَ من الارض اما كَكَر السلاطين عالى نوعاَ ما كما ظاهر بالصورة
http://www.elafoon.net/board/up/download.php?img=2924

وكمان فى الكِركِر وهو شجر ثمرته لذيذة جداَ وتصنع من فروعه مفاريك الملاح

سلوى حسن جمبو
02-05-2011, 03:51 PM
(الشِبِرْ) كما ذكرت الأخت الفضلى سلوى ال(قُفّة) الصغيرة المصنوعة من السعف تستخدم لذات الغرض المُشار إليه ولبعض الأغراض الأُخرى ويقْرُب منها في النطق ال(شُويِر)وهو الطبق المصنوع من سعف النخيل أيضاًَ.
أهديكم سلامى بالقفة والشِبِرْ ظاهرة فى الخلف
http://www.elafoon.net/board/up/download.php?img=2925

وأشواق مغطية بطبق المحنة
http://www.elafoon.net/board/up/download.php?img=2926

توحيده لطفي احمد سعد
02-05-2011, 03:57 PM
ماشاءالله يااختي سلوى انت فعلا مرجع بعد كده حنرجع ليك في كل كبيره وصغيره ، ونشكرك كتير علي المعلومات القيمه والشرح الوافي على كلام الاخ هاشم عبدالكريم ولسه فى انتظار المزيد...اما الشاعر اخونا ياسر خيري حنرجع ليك في الكلمات النوبيه ،واعتقد ان كلمة قوقايه التي سالتني منها مني كلمه نوبيه اود معرفة معنى الكلمه سواء كانت نوبيه او غير ذلك...

ياسر عبدالرحمن خيري
02-05-2011, 04:05 PM
القوقاية كلمة من قلب العامية السودانية معروفة في منطقة الجزيرة وهي آلة خشبيّة في شكل (الشعْبة) تستخدم في غزل القطن محلياً والله أعلم...

سلوى حسن جمبو
02-05-2011, 04:09 PM
محطتي المحميّة وحوش بانقا كانتا
مشهورتان بالصناعات السعفيّة. يعني من المحطتين ديل ممكن تشتري مُصلآية، حنقوق، هبابة،طبق، كبديق،
حوش بانقا إستطاعت ان تنتج اكبر قُفّة في تاريخ القُفف

http://www.elafoon.net/board/up/download.php?img=2927

سلوى حسن جمبو
02-05-2011, 04:17 PM
القوقاية كلمة من قلب العامية السودانية معروفة في منطقة الجزيرة وهي آلة خشبيّة في شكل (الشعْبة) تستخدم في غزل القطن محلياً والله أعلم...
أصبت أخى ياسر الغوغاية عبارة عن مصنع غزل صغير مبسط للقطن تصنع بالبيوت
من عودين وأعمدة حديد {للغزل}
والقوقاية تستعمل لتنظيف القطن من بذرته السوداء اللون{القُلقُل}

هاشم عبد الكريم
02-05-2011, 04:40 PM
محطتي المحميّة وحوش بانقا كانتا

مشهورتان بالصناعات السعفيّة. يعني من المحطتين ديل ممكن تشتري مُصلآية، حنقوق، هبابة،طبق، كبديق،
حوش بانقا إستطاعت ان تنتج اكبر قُفّة في تاريخ القُفف


http://www.elafoon.net/board/up/download.php?img=2927

ما شاء الله ، ديل ما خلو ليهم (حنقوق) فى السوق فما الفرق بين الحنقوق والطنقوق ؟
والكبديق جابو اخونا ياسر لتغطية صينية الوجبة التى يستاهلها اخونا التيت ودفعته بالمنتدى قبل الكِبار.

um rayan
02-05-2011, 04:54 PM
ما شاء الله ، ديل ما خلو ليهم (حنقوق) فى السوق فما الفرق بين الحنقوق والطنقوق ؟
والكبديق جابو اخونا ياسر لتغطية صينية الوجبة التى يستاهلها اخونا التيت ودفعته بالمنتدى قبل الكِبار.
الحنقوق هو السعف يشقق ليصنع منه المكانس والكبديق(الطبق)

عبدالله التيت
02-05-2011, 04:55 PM
يستاهلها اخونا التيت ودفعته بالمنتدى قبل الكِبار.
تستاهل كل خير اخونا هاشم
نحن بننتظر الحلو، مايبقى الحلو البغسل الايادى ،هههههههه خليك معانا انتظر الحلو أنت وخالك صديق

سلوى حسن جمبو
02-05-2011, 05:24 PM
الحنقوق هو السعف يشقق ليصنع منه المكانس والكبديق(الطبق)
صدقتى عزيزتى ام ريان
الحنقوق :السعف المستخدم لصناعة جميع الاغراض من بروش وقفاف ....لاخره
الطنقوق :هو الحلقوم
الكبديق : قفه مصنوعه من السعف لها غطاء لحفظ الماكولات الجافه

الكابدلو بنفس الفكرة لكن بكون اكبر واعمق لحمل اغراض اكثر

هاشم عبد الكريم
02-05-2011, 05:30 PM
ألكع أفتحو بِسراع قبال ما نبقالو طُرُش فى الزفة !!!
عليك الاسراع بفتح الصفحة الخاصة بموضوع الكلمات الجديدة المستعملة فى السودان (لُغة الرندوك ) قبل ان يكون حالنا كحال الاطرش الماشى فى زفة العرسان وما عارف القوّل فى شنو )

هاشم عبد الكريم
02-05-2011, 06:01 PM
(الله يكفينا شر الصلبته والدخول بين القشرة والثمرة) الترماج :قطار قديم وافتكر هو التُرام ،قطار داخلى بالعاصمة .
الاسكلا : الميناء (من الأسكلا وحلا )
الكمُسارى ماديرة شرح غير ان الصفارة والطربوش ترتبط به ،
شيتكم ده خباروا موتام ، لا فيهو مسطريمة لا قِده لا طالوش لا بربيت لا ترويسه لا حمار لا سقاله لا عفريته مالو؟ ويوميتو قُوال وله مقطوعيه ؟؟
الترماج ياهو تمام (سمعنا بيه ووصفوه لينا ولم نُحظى بالفُسحة عليه)
الاسكلا :الميناء النهرى
وباقى حاجات البناية نضيف عليهم :الشعبة ،الأمينة،المِرق،والرصاص ونتحرى المهندسين والجنزرجية عُقب ما يودونا التُمنة .ونروح شمار فى مرقه

هاشم عبد الكريم
03-05-2011, 05:08 PM
الكماشه، اما الكماشه يمسك بها الاناء وهو في النار...لكن مامتاكده صححوني لوكنت غلطانه... .
الكماشة التى يمسكوا بها الإناء فى النارلاتكون إلا فى حالة يكون النجار أو النقُلتى أو الحداد وواحد منهم طابخ القطر قام وما معاه قماش ،فى الحالة دى يستخدم الكماشة لحمل الحلة الحارة، ولو انه توجد هنالك اداة لحمل الحلة وهى حارة ولكن لا أظن ان اسمها الكماشة ونحنا ما خابرِنها ، ( شاوروا اخونا فلة ياناس الرياض )



http://www.elafoon.net/board/up/download.php?img=2934

ودريا
03-05-2011, 09:46 PM
يحكي انه ايام الحكم الانجليزي جاء احد المواطنين يطلب اجازة لزيارة اهله بعد غياب وقوبل ذلك بتعنت صاحب العمل فما كان منه الا ان اتجه للقاضي الانجليزي وحينما دخل عليه قائلا :
بهائم ود البرجوبه لمن في جرفي عدمنوا الاسكه .
وهنا التفت القاضي للمترجم السوداني ماذا يعني هذا الكلام ؟
المترجم قال ليهو الزول ده قال ليك في اجازة ؟
القاضي قال ليهو No

توحيده لطفي احمد سعد
04-05-2011, 04:29 AM
الاخ هاشم كلامك صح 100% انا في الاول كنت فاكره الكماشه تستمل لحمل الاناء وهو في النار حينما يكون الاناء من غير يد ،وبعد ذلك عرفت حينما صححني ذوي الاختصاص ان الكماشه تستعمل كما ذكرت واشكرك على التصحيح اخي هاشم...وفي انتظار المزيد.

هاشم عبد الكريم
04-05-2011, 06:07 PM
يحكي انه ايام الحكم الانجليزي جاء احد المواطنين يطلب اجازة لزيارة اهله بعد غياب وقوبل ذلك بتعنت صاحب العمل فما كان منه الا ان اتجه للقاضي الانجليزي وحينما دخل عليه قائلا :
بهائم ود البرجوبه لمن في جرفي عدمنوا الاسكه .
وهنا التفت القاضي للمترجم السوداني ماذا يعني هذا الكلام ؟
المترجم قال ليهو الزول ده قال ليك في اجازة ؟
القاضي قال ليهو no
شكرا اخونا العزيز المهندس ود ريا على مشاركتك الثرة ،ونتمنى ركوبك القطار معنا دائماً،ما قلته بإختصار هو ذكاء المعرفة المُدعم بالفطنة للسلف فى فهم البعيد ،ولكننا لسنا مثلهم ولكن سنحاول،فعدم منح الاجازة معروف للقاضى و المترجم ، وهما لا يعرفا شخصاً باسم ود البرجوبة وهى الطين اللزج الاسود ،إشارة للطين أصل الانسان فهنا شخص مُبهم،وبهائمه وجدت الفرصة فى دخول الجرف الغير محروس واكلت الزرع وخربت المتاريس والحفر والسرابات ،ولمم تترك شىء لغياب (إنسان )المالك والحارس ،فحوجته للذهاب لهناك لاصلاح الحال وهو المطلب الذى فسره واختصره المُترجم بالإجازة وأوجز القاضى حكمه السريع بالنفى فوراً.والله أعلم .

هاشم عبد الكريم
04-05-2011, 06:18 PM
الاخ هاشم كلامك صح 100% انا في الاول كنت فاكره الكماشه تستمل لحمل الاناء وهو في النار حينما يكون الاناء من غير يد ،وبعد ذلك عرفت حينما صححني ذوي الاختصاص ان الكماشه تستعمل كما ذكرت واشكرك على التصحيح اخي هاشم...وفي انتظار المزيد.
ولك الشكر ايضا اختنا الكريمة للمتابعة ،ولكن ناس الكوره عندهم إستعمال لكلمة الكماشة فى خطط كرة القدم ،ونترك اهل الشأن يفسروها لينا بدل ما يحسبوها علينا مخالفة سارق

صديق حسن الأمين
06-05-2011, 12:20 AM
مشكورة سلوى على تلك الاكلات الشهية وزي ما بقولو بليلة مباشر ولا ضبيحة مكاشر
لتكمل ليك المثل ببليلة مباشر لازم تكتب ليك قصة اولادها مع (الويكاب) بعد تفسيره وطبخه

صديق حسن الأمين
06-05-2011, 12:30 AM
الكرارك هى اعواد الاشجار بعد قطعها وبترها وتستعمل فى بناء الرواكيب
التيت اخوى باقيلى إت زول زراعة كارب المدودهك فى الغُربة شنو؟
حبابك تانى وأمسك عليك دى وكتِر عليها:
الكِشيب : ما تبقّى في الزرع بعد الحصاد من حبوب أو قناديل يراجع جمعه وغربلته المساكين أو صاحب الزرع نفسه.

صديق حسن الأمين
06-05-2011, 12:41 AM
كان (علبت) (الوناسة)(وتاوقت)في(نفاج)(البوست)(الليلنا)كان عرفتنا
لك الود اكرر دعوتك للبوست الخاص بهذا الموضوع
النفاج : باب المحنه الكان زمان بين الجيران دون إستئذان

صديق حسن الأمين
06-05-2011, 12:45 AM
أم دقوقه وما أدراك ما أم دقوقه !!
نتمنى من الدكتورة عائشة والدكتورة تماضر يُحدثونا عن أم دقوقه وياريت كمان ويلقوا لينا الضوء عن أخر ما توصل له العلم بخصوص هذا المصل الهام !!!:ansmile09:
ود الحبر هوى!! اسألهن من البصيرة ام حمد كان ما حذفوها من المُقرر،

صديق حسن الأمين
06-05-2011, 12:55 AM
اخواني اسألكم في واحد منكم قعد مع الوالده جنب الصاجن وإستناها لمن عاست "اللُقمه" وأدتو "الشيط"والشيط ده باقي العجين البكون ماسك في الصاجن بعد ما الوالده تتطلع "اللُقمه"وهو بكون زي الكسره رهيفه ولكنو اتقل وانشف شويه.



ومنها جاء اسم الشيطة المعروفة بالجريف غرب
وإضافة :
الكُورارة :وهم ماتبقى من الكسرة فى طرف الصاج (الفتات)

عبدالله التيت
06-05-2011, 12:57 AM
التيت اخوى باقيلى إت زول زراعة كارب المدودهك فى الغُربة شنو؟
حبابك تانى وأمسك عليك دى وكتِر عليها:
الكِشيب : ما تبقّى في الزرع بعد الحصاد من حبوب أو قناديل يراجع جمعه وغربلته المساكين أو صاحب الزرع نفسه.
مازول زراعة لكن كترة الونسة و(النِقة )مع ناس الزراعة علمتنا حاجات كتيرة.
كدى شوف لينا الادوات دى
السلوكة ، الشادوف ، التقنت ، السَراب ، الملُوت ، المنجل .

صديق حسن الأمين
06-05-2011, 01:04 AM
البُرمة : بضم الباء هو الزير الذى نشرب منه الماء وهو مصنوع من الفخار
والدووانه :إنا من الفخار يشبه الزير الكبير من الفخار ايضاً

عبدالله التيت
06-05-2011, 01:07 AM
بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !

صديق حسن الأمين
06-05-2011, 02:27 AM
القصيدة منقولة بالنص الذي شارك عبد الله محمد عبد الدائم اليوم في مكان اخر
ولارتباط بعض الجمل والكلمات الواردة فيها بهذا البوست
نرجو من المتداخلين استخراج هذه الجمل والكلمات ؟ حتي يتمكن اخرون من الاجابة عليها
..
القصيدة رصينة تب، (عُقب من تالاى وقفت الكاشف أخوى مايفسر إلا ننطُر ونسمع جنى ود خيرى ،وإيهاو سيد القول فى النضِم الهولو)

صديق حسن الأمين
06-05-2011, 02:57 AM
مازول زراعة لكن كترة الونسة و(النِقة )مع ناس الزراعة علمتنا حاجات كتيرة.
كدى شوف لينا الادوات دى
السلوكة ، الشادوف ، التقنت ، السَراب ، الملُوت ، المنجل .
الونسه سمحة ولكن نقة المزارعين دائما مع ناس الضرائب .نشوف ليك طلبك ونحن ناس صف إنتباه ويمين دور قبال ما يجو مهندسين الزراعة يدورونا شمال :
السلوكة :آلة زراعة خشبية طويلة سنينة من قدام بها خشبة جانية للرجل للضغط على الارض عند الحفر وتشخدم لزراعة الزرة .
التقنت:عمل حاجز من التراب حول حوض الزرع لحفظ مياه الرى .
الملوت :هو الملود آله حديدية حادة بمقبض خشبى تستخدم لتنظيف الارض المزروعة من الحشائش والنباتات الضارة .
المنجل:آلة حديدية حادة صغيرة الحجم مقوسة تستخدم لحش القش او البرسيم للدواب وتنظيف الاشجار الصغيرة وتنظيف النخيل ايضا.
السراب :الصفوف المرتبه من الجداول الصغيرة فى المزرعة .
والشادوف والساقية وشغلات السقاية الفرصة لاهل الاختصاص حتى تعم الفايدة .

عبدالله التيت
06-05-2011, 03:10 PM
الونسه سمحة ولكن نقة المزارعين دائما مع ناس الضرائب .نشوف ليك طلبك ونحن ناس صف إنتباه ويمين دور قبال ما يجو مهندسين الزراعة يدورونا شمال :
السلوكة :آلة زراعة خشبية طويلة سنينة من قدام بها خشبة جانية للرجل للضغط على الارض عند الحفر وتشخدم لزراعة الزرة .
التقنت:عمل حاجز من التراب حول حوض الزرع لحفظ مياه الرى .
الملوت :هو الملود آله حديدية حادة بمقبض خشبى تستخدم لتنظيف الارض المزروعة من الحشائش والنباتات الضارة .
المنجل:آلة حديدية حادة صغيرة الحجم مقوسة تستخدم لحش القش او البرسيم للدواب وتنظيف الاشجار الصغيرة وتنظيف النخيل ايضا.
السراب :الصفوف المرتبه من الجداول الصغيرة فى المزرعة .
والشادوف والساقية وشغلات السقاية الفرصة لاهل الاختصاص حتى تعم الفايدة .

كفيت وأوفيت
ماقصرت اخ صديق لك الشكر والتحايا
بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !

سلوى حسن جمبو
09-05-2011, 05:43 PM
التَرويصة
القِده
والشنِيشة
والسِقاله
والحُمار
اب َراسين
والعَتله
القِمطة
والخَفجة



(شيتكم ده خباروا موتام ، لا فيهو مسطريمة لا قِده لا طالوش لا بربيت لا ترويسه لا حمار لا سقاله لا عفريته مالو؟ ويوميتو قُوال وله مقطوعيه ؟؟
وباقى حاجات البناية نضيف عليهم :الشعبة ،الأمينة،المِرق،والرصاص ونتحرى المهندسين والجنزرجية عُقب ما يودونا التُمنة .ونروح شمار فى مرقه

حصر لقليل من أدوات ومُصطلحات البناء ،قُدمت الطلبات من الصفحة الأولى ،والمهندسين والمقاولين والبنائين والطُلب وأصحاب المغالق عاملين ما سامعين ام أسعار قيمة تمليك المعلومه غير كافية ؟؟؟؟؟؟
تقديم الدعوة من جديد وبارك الله فى من تعلم وعلم ،

صديق حسن الأمين
13-05-2011, 04:05 PM
بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !
بعد السلام عليكم جميعاً،
زماااااااان يا اخوى عبدالله الفدان كان فيه :4046.86 متر مربع وما عارفه الزمن دا كمهو!! كان ما بقى إنقاية !!!
أما الحبل فقياس بلدى قديم وخاص بزراعة الجزر والاراضى النيليه وهو تقريبا يقُاس بالشبحة العادية للفرد يعنى تقريبا تعادل يارده
وانواع الحبال (زمان):
تُمانى :ثُمانى 4 خطوات = حبل =3.75 متر تقريباً
عُشارى(ما تُمساح):5 خطوات = حبل 4.7 متر تقريبا،

صديق حسن الأمين
13-05-2011, 04:25 PM
ومع غياب المهندسين عن الاجابة لما سبق من مصطلحات ،نواصل فى الزراعه :
الكدنكه :
النجامة :
المطمورة :
الجنكيب :
البلدات :
الكديبة :
الكاجريب :
الكركجية :
الهربه :
النبرو :
الجُرق : (ويقولو فلان جُرق )
اللبقه:
الكاويق:
العقيق :
البركيت:
الورتاب:
القيف : أغنية العملاق زيدان إبراهيم (والقيف يعاين القيف)
الدرت :
القنقرة :

هاشم عبد الكريم
14-05-2011, 09:50 PM
وانواع الحبال (زمان):
تُمانى :ثُمانى 4 خطوات = حبل =3.75 متر تقريباً
عُشارى(ما تُمساح):5 خطوات = حبل 4.7 متر تقريبا،
القياسات أعلاه خاصة بالعرض فقط أما الطول بحسب طول الساحل ونهايته وإتفاق المزاعين .
(ده لو ما أخونا ابو مازن جاء بفتوى طول أُخرى بقياس الكرتوم)

هاشم عبد الكريم
14-05-2011, 10:12 PM
ود الحبر هوى!! اسألهن من البصيرة ام حمد كان ما حذفوها من المُقرر،
البصيرة ام حمد دى اكيد حزفوها من المقرر زمان مع قلم الاردواز وحساب التلميذ والريشة والسنة والبنة والمحبرة وحوض الريشة وخرم المحبرة وجك تعبئة الحبر،وود الحبر يكون حضر اخرها وهى تودع راكبة المدونة الطبيعية .
البصيرة : تعنى المرأة الخبيرة ذات التصرف المناسب فى الوقت المناسب وقد تكون قديما هى الطبيبة البلدية (تجبير -كسور عظام -وتوليد (فى حالات تغلب فيها الداية الحيلة فى التوليد )وحتى حالات إدخال الغنمايات ريسينهن فى البرام ،او خلع خاتم او غويشة اصغر مقاس ، حالة إدخال الاصبع فى زجاجة ،وتحنيك الشفع ،وشد المفاصل ،ومعالجة الفليته،واخراج اللسان فى حالات بلعه وبلع اشياء تقف فى الحلق كشوكة السمك او لحم شحم ثمين وأشياء من هذا القبيل .والبصيرة كانت دائماً معروفة من كل اهل البلد ،وحتى ان الخبرة تكون بالتوارث فى حالة المتابعة .

هاشم عبد الكريم
14-05-2011, 10:41 PM
[quote=صديق حسن الأمين;116130]ومع غياب المهندسين عن الاجابة لما سبق من مصطلحات ،نواصل فى الزراعه
(ما دام قت كدى خلنا النسرح لامن الترابلة و النواتية يكوركولنا)
الكدنكه هي الاداةالتي تقطع بها الحشائش وتختلف عن الطورية بشكلها المثلث وحدتها .وقصر عودها .يعنى من الصعوبة استعمالها فى حالة الوقوف ,
النجامة: نوع من الالات الصغيرة لنظافة المزارع شكها هلالى اصغر
المطمورة هي حفرة داخل الارض يخزن فيها العيش لفترات
الجنكيب : هو الحف بالطورية (وهي اداء تستخدم للحفر) للبزوراثناء غرسها
البلدات = الأرض التي يزرع فيها القصب والعيش
الكديبة: ازالة الحشائش الصغيرة من المزارع بعد عملية النظافة الاولي
الكاجريب ..ترَّس ترابى
الكركجية : هي طين البحر المتشقق تربة طينية خصبة جد بعد التسوية .
الهربه:حفره داخل حوض الزرع تتشكل بفعل التششقات فى التربه وهى غير مرغوبه لانها تسرب مياه الرى لداخل التربه
النبرو= ري الارض بالجوز عبارة عن صفيحتين قديماً اوجركانتين حديثاً.معلقات على عصا قوية توضع على الكتف بالتوازن .
الجُرق = التور البيعتمد عليه في الزراعة وجر المُحرات ويقولو فلان جرق يعني يعتمد عليه ، زولاً راكز تب.
اللبقه:حاجز من الطين يستخدم فى الجدول ليجعل المياه تتدفق داخل حوض معين. كما انها ايضا اكبر اناء لحمل الاشياء ,
الكاويق: النضج الزايد للمحاصيل مثل البامية تنشغ على أغصانها .
العقيق : العنكوليب (ود عم قصب السكر وانحف منه .)
البركيت: هو ( بعد عملية حصاد الفول (القلع) يظل هناك فول داخل الأرض و يتم إستخراجه عبر الحفر و هذا يسمى فول البركيت)
(الورتاب) هو نوع من القصب الناشف الجاف يستخدم طعام (لاصحاب أنكر الاصوات ) الله يكرمكم
القيف : طبعاً معروف وهوجانبي النيل او جانبى التُرع (والقيف يعاين القيف)
الدرت ـــــ موسم الحصاد
القنقرة ـــــ قندول الزرة

هاشم عبد الكريم
14-05-2011, 11:23 PM
التَرويصة
القِده
والشنِيشة
والسِقاله
والحُمار
اب َراسين
والعَتله
القِمطة
والخَفجة

ولغياب المقاولين والمهندسين واصحاب الشأن لغلاء الاسعار نواصل التدخل شاحدين المُسامحة:
التَرويصة: هو أول قالب مبنى فى بداية الحائط ويكون طوله فى عكس إتجاه الحائط أو الزاوية الخارجية للحائط ،وغالبا الاركان اولا ومناطق قطع الابواب والشبابيك .
القِده:خشبة مسطحة لمواساة خطوط الطوب او المونه الحاملة للطوب .
والشنِيشة: فتحة فى الحائط -لتركيب سقالة -مكيف- رابط خشبى بين حائطين .
والسِقاله:اخشاب عريضة لحمل البنائين بارتفاع المبنى .
والحُمار:قاعدة مثلثة على شكل حرف a بزيادة عارض قائم لحمل اخشاب السقالة
اب َراسين:الحامل ذو الاتجاهين للسقالات .
والعَتله (الحفارة) قضيب معدنى ذو سنة سنينة كالسكين وحادة تستخدم للحفر بالارض او على الحيط .
القِمطة: قطعة معدنية تقوم بتثبيت قطعتين خشبيتين فى زوايا مختلفة ،عند البناء تمُسك بالضرب بالشاكوش وعند النجارين بالربط بدوائر حلزونية.
والخَفجة: خلط قطع الطوب الصغيرة بالاسمنت والرمل والماء ووضعها على قوالب منحنية لغرض السقف المُسلح.
واصحاب الشأن لو ما عجبهم عليهم إعادة التركيبة .بالمقطوعية .

سلوى حسن جمبو
15-05-2011, 01:01 AM
لتكمل ليك المثل ببليلة مباشر لازم تكتب ليك قصة اولادها مع (الويكاب) بعد تفسيره وطبخه
الويكاب أصلاً هو قصب الذرة المحروق ويتم تركيبه بعملية كيميائية بسيطة يمر من خلالها على النار ليتبخر الماء الناتج عن التقطير ويتحول في النهاية إلى حجر يشبه العطرون ..ويباع الويكاب حالياً في شكل حجارة في الدكاكين الخاصة بالبهارات ....وهو طعام بلدي مميز للذين يعرفونه
وممكن نعمل ملاح الويكاب من غير الويكاب الأصلى ودى طبعاً من أفكار الغربة والطريقة كالاتى نجيب بصلة كبيرة ونضعها فى موية على النار ونضع عليها ملعقة صغيرة من كربونات الصودا وبعد ما تدوب البصلة نضيف ليها حليب والبهارات والملح ونلايقها بالويكة وعندنا فيه طرفة لما أول مرة عملته وقلت لإبنتى الكبيرة أمنية نادى أخوانك اليوم عندنا أكلة سودانية أسمها الويكاب فقالت ليهم تعالوا الأكلة دى بتصحيكم بسرعة ترجمت كلمة
{ wake up}أتمنى الجيع يجربوه عشان يصحوا

حسن محمد
15-05-2011, 10:07 AM
الويكاب أصلاً هو قصب الذرة المحروق ويتم تركيبه بعملية كيميائية بسيطة يمر من خلالها على النار ليتبخر الماء الناتج عن التقطير ويتحول في النهاية إلى حجر يشبه العطرون ..ويباع الويكاب حالياً في شكل حجارة في الدكاكين الخاصة بالبهارات ....وهو طعام بلدي مميز للذين يعرفونه
وممكن نعمل ملاح الويكاب من غير الويكاب الأصلى ودى طبعاً من أفكار الغربة والطريقة كالاتى نجيب بصلة كبيرة ونضعها فى موية على النار ونضع عليها ملعقة صغيرة من كربونات الصودا وبعد ما تدوب البصلة نضيف ليها حليب والبهارات والملح ونلايقها بالويكة وعندنا فيه طرفة لما أول مرة عملته وقلت لإبنتى الكبيرة أمنية نادى أخوانك اليوم عندنا أكلة سودانية أسمها الويكاب فقالت ليهم تعالوا الأكلة دى بتصحيكم بسرعة ترجمت كلمة
{ wake up}أتمنى الجيع يجربوه عشان يصحوا
هههههههههههههاااااااا عربنيزي يامرسي

Abu mohamed
15-05-2011, 11:55 PM
ولغياب المقاولين والمهندسين واصحاب الشأن لغلاء الاسعار نواصل التدخل شاحدين المُسامحة:
التَرويصة: هو أول قالب مبنى فى بداية الحائط ويكون طوله فى عكس إتجاه الحائط أو الزاوية الخارجية للحائط ،وغالبا الاركان اولا ومناطق قطع الابواب والشبابيك .
القِده:خشبة مسطحة لمواساة خطوط الطوب او المونه الحاملة للطوب .
والشنِيشة: فتحة فى الحائط -لتركيب سقالة -مكيف- رابط خشبى بين حائطين .
والسِقاله:اخشاب عريضة لحمل البنائين بارتفاع المبنى .
والحُمار:قاعدة مثلثة على شكل حرف a بزيادة عارض قائم لحمل اخشاب السقالة
اب َراسين:الحامل ذو الاتجاهين للسقالات .
والعَتله (الحفارة) قضيب معدنى ذو سنة سنينة كالسكين وحادة تستخدم للحفر بالارض او على الحيط .
القِمطة: قطعة معدنية تقوم بتثبيت قطعتين خشبيتين فى زوايا مختلفة ،عند البناء تمُسك بالضرب بالشاكوش وعند النجارين بالربط بدوائر حلزونية.
والخَفجة: خلط قطع الطوب الصغيرة بالاسمنت والرمل والماء ووضعها على قوالب منحنية لغرض السقف المُسلح.
واصحاب الشأن لو ما عجبهم عليهم إعادة التركيبة .بالمقطوعية .
إبداااااااااااااااااااااااااااع
:wrd:

هاشم عبد الكريم
16-05-2011, 01:03 AM
الويكاب أصلاً هو قصب الذرة المحروق ويتم تركيبه بعملية كيميائية بسيطة يمر من خلالها على النار ليتبخر الماء الناتج عن التقطير ويتحول في النهاية إلى حجر يشبه العطرون ..ويباع الويكاب حالياً في شكل حجارة في الدكاكين الخاصة بالبهارات ....وهو طعام بلدي مميز للذين يعرفونه
وممكن نعمل ملاح الويكاب من غير الويكاب الأصلى ودى طبعاً من أفكار الغربة والطريقة كالاتى نجيب بصلة كبيرة ونضعها فى موية على النار ونضع عليها ملعقة صغيرة من كربونات الصودا وبعد ما تدوب البصلة نضيف ليها حليب والبهارات والملح ونلايقها بالويكة وعندنا فيه طرفة لما أول مرة عملته وقلت لإبنتى الكبيرة أمنية نادى أخوانك اليوم عندنا أكلة سودانية أسمها الويكاب فقالت ليهم تعالوا الأكلة دى بتصحيكم بسرعة ترجمت كلمة

{ wake up}أتمنى الجيع يجربوه عشان يصحوا

يحلو ملاح الويكاب إذا صاحبه صحن (كَول) وهو نبات يُقال انه يحتوى على كريستيلات تساعد فى خفض إرتفاع الدم،خفض الكلسترول ،تنظيم السكر،
ومن الأفضل والأحسن والأوجب تجنُب إستنشاق رائحته (يمكن التحايل بوضع سمك (كوركى) على المائدة )

(أكيد عزيزنا د.بدر الدين يعرفه تماماً عندما كان بالغرب فى المراحل الثانوية ولكن بعدها لايريد حتى أن يرى كتابة حروفه .....)

هاشم عبد الكريم
16-05-2011, 01:55 AM
انت فاضي من (التيوة) قاعد (تضقل) ساي مع ناس سكوها وكردوها وجروا وراها عرفتها شنو (الجلدة) اها ليقيتنا كيف(جكسا) عديييل كدة مع انو خليناها من زمن (الشراب)
الوجلة جرت لينا حاجة من القديم ولمزيد من الايضاح:

الضُقل بضم الضاد و القاف تطلق على قصير القامة

أما بفتح الضاد والقاف فهى اى قطعة خشيبية (عود) وبعصا قصيرة يلعب بها صديق وابومازن وجماع وهاشم وقاسم السر وياسرخيرى ويحكمها النيل ضقل وود الحبر ومعتصم وصديق السر ويحكمها ود الياس (سكّج بكّج)

أما بفتح الضاد وكسر القاف فهو تنطيط الكورة بالرجل دون ان تلامس الارض
(ودى الشغلانه الرياضية الوحيدة الانا شاطر فيها فى مسك الدفة)